برسلز: یورپی یونین نے معروف چینی ای کامرس پلیٹ فارم علی ایکسپریس (AliExpress) پر 55 کروڑ یورو (550 ملین یورو) کا ریکارڈ جرمانہ عائد کر دیا ہے۔ یورپی حکام کے مطابق پلیٹ فارم غیر قانونی، جعلی اور غیر محفوظ مصنوعات کی فروخت روکنے میں مؤثر اقدامات کرنے میں ناکام رہا۔
یورپی کمیشن کی تحقیقات کے مطابق علی ایکسپریس پر ایسی متعدد مصنوعات فروخت کی جا رہی تھیں جو یورپی یونین کے سخت حفاظتی، صحت اور ماحولیاتی معیارات پر پوری نہیں اترتی تھیں۔ ان میں غیر محفوظ بچوں کے کھلونے، کاسمیٹکس اور دیگر صارفین کی مصنوعات شامل تھیں۔
تحقیقات میں یہ بھی سامنے آیا کہ جب صارفین یا حکام کی جانب سے غیر قانونی یا خطرناک مصنوعات کی نشاندہی کی جاتی تھی تو ان میں سے کئی مصنوعات ہفتوں تک پلیٹ فارم پر فروخت کے لیے دستیاب رہتی تھیں۔ اسی طرح جعلی مصنوعات کی روک تھام کے لیے بھی مناسب اقدامات نہیں کیے گئے۔
یورپی یونین کی ٹیکنالوجی امور کی سربراہ ہینا وِرکونن نے کہا کہ آن لائن صارفین کا تحفظ ہر بڑے ڈیجیٹل پلیٹ فارم کی بنیادی ذمہ داری ہے۔ ان کے مطابق پلیٹ فارمز کو ممکنہ خطرات کی بروقت نشاندہی، ان کا مؤثر تدارک اور محفوظ آن لائن خریداری کو یقینی بنانا ہوگا۔
یہ جرمانہ ڈیجیٹل سروسز ایکٹ (Digital Services Act – DSA) کے تحت اب تک عائد کیا جانے والا سب سے بڑا مالی جرمانہ قرار دیا جا رہا ہے۔ یہ قانون 2022 میں نافذ کیا گیا تھا تاکہ بڑی ٹیکنالوجی کمپنیوں اور آن لائن پلیٹ فارمز کو صارفین کے تحفظ اور غیر قانونی مواد کے حوالے سے زیادہ جوابدہ بنایا جا سکے۔
اس سے قبل یورپی یونین سوشل میڈیا پلیٹ فارم ایکس (X) پر 12 کروڑ یورو جبکہ آن لائن شاپنگ پلیٹ فارم ٹیمو (Temu) پر 20 کروڑ یورو کا جرمانہ بھی عائد کر چکی ہے۔
دوسری جانب علی ایکسپریس نے یورپی یونین کے فیصلے کو "غیر متناسب” قرار دیتے ہوئے کہا ہے کہ کمپنی نے حالیہ برسوں میں صارفین کے تحفظ کے لیے رسک مینجمنٹ نظام کو مزید مؤثر بنایا ہے اور متعدد اصلاحات نافذ کی ہیں۔ کمپنی نے اعلان کیا کہ وہ اس فیصلے کے خلاف قانونی اپیل دائر کرے گی۔
یورپی کمیشن کے مطابق جرمانے کی رقم کا تعین خلاف ورزیوں کی نوعیت، ان کے اثرات اور خلاف ورزیوں کے دورانیے کو مدنظر رکھتے ہوئے کیا گیا۔
اعداد و شمار کے مطابق یورپی یونین میں علی ایکسپریس کے تقریباً 19 کروڑ 30 لاکھ صارفین موجود ہیں، جبکہ شین (Shein) کے 15 کروڑ 60 لاکھ اور ٹیمو (Temu) کے تقریباً 13 کروڑ صارفین ہیں، جس کے باعث یورپی یونین علی ایکسپریس کی سب سے بڑی عالمی مارکیٹ سمجھی جاتی ہے۔
