اسلام آباد: پاکستان اور سعودی عرب کے درمیان اہم اقتصادی معاہدے طے پا گئے ہیں جن کے نتیجے میں ملک میں بڑے پیمانے پر غیر ملکی سرمایہ کاری کی راہ ہموار ہوگئی ہے، جبکہ کراچی-حیدرآباد موٹر وے سمیت مختلف اہم منصوبے ان معاہدوں کا حصہ ہیں۔
تفصیلات کے مطابق سعودی پاک جوائنٹ بزنس کونسل کے اجلاس میں اسلام آباد میں دونوں ممالک کے درمیان سرمایہ کاری کے متعدد معاہدوں پر دستخط کیے گئے۔ ان معاہدوں میں پورٹس، موٹر ویز، معدنیات اور ریئل اسٹیٹ کے شعبوں میں تعاون شامل ہے۔
حکام کا کہنا ہے کہ کراچی-حیدرآباد موٹر وے کی تعمیر و ترقی کے لیے بھی سعودی عرب کے ساتھ معاہدہ طے پا گیا ہے، جس کے علاوہ بندرگاہوں کی بہتری اور توسیع کے منصوبوں پر بھی اتفاق کیا گیا ہے۔
اجلاس میں سعودی سرمایہ کاروں کو پاکستان کے پاور سیکٹر، ٹرانسمیشن لائنز، اسمارٹ میٹرنگ، پیٹرولیم اور معدنی وسائل کے شعبوں میں سرمایہ کاری کے مواقع پر تفصیلی بریفنگ دی گئی۔ اس موقع پر بزنس ٹو بزنس اور حکومتی سطح پر متعدد ملاقاتیں بھی ہوئیں۔
اجلاس کی مشترکہ صدارت سابق نگراں وفاقی وزیر گوہر اعجاز اور پاک سعودی جوائنٹ بزنس کونسل کے چیئرمین فواد مختار نے کی، جبکہ سعودی وفد کی قیادت شہزادہ منصور بن محمد السعود نے کی۔ وفاقی وزراء اور اعلیٰ حکام نے بھی اجلاس میں شرکت کی۔
ڈائریکٹر جنرل ایس آئی ایف سی میجر جنرل اسد الرحمٰن نے سعودی سرمایہ کاروں کا شکریہ ادا کرتے ہوئے کہا کہ پاکستان میں غیر ملکی سرمایہ کاری کے لیے سازگار ماحول فراہم کیا جا رہا ہے۔
سابق نگراں وزیر گوہر اعجاز نے کہا کہ سعودی سرمایہ کار پاکستان میں بڑھتی ہوئی دلچسپی کا اظہار کر رہے ہیں، اور دونوں ممالک کے درمیان دوطرفہ اقتصادی تعاون کو فروغ دیا جا رہا ہے۔ ان کے مطابق پاکستان میں سرمایہ کاری کے لیے وسیع مواقع موجود ہیں اور غیر ملکی سرمایہ کاروں کو پرکشش منافع بھی حاصل ہو سکتا ہے۔
