مظفرآباد: آزاد جموں و کشمیر قانون ساز اسمبلی کے عام انتخابات کے لیے باقاعدہ انتخابی شیڈول جاری کر دیا گیا ہے، جس کے تحت 27 جولائی 2026 کو 33 عام نشستوں اور مہاجرینِ جموں و کشمیر کے لیے مختص 12 نشستوں پر پولنگ ہوگی۔
چیف الیکشن کمشنر آزاد کشمیر جسٹس (ر) غلام مصطفیٰ مغل نے ممبران الیکشن کمیشن کے ہمراہ پریس کانفرنس کرتے ہوئے انتخابی پروگرام کا اعلان کیا۔ انہوں نے کہا کہ شفاف، آزادانہ اور منصفانہ انتخابات کے انعقاد کے لیے تمام ضروری انتظامات مکمل کیے جا رہے ہیں، جبکہ سیکیورٹی کو یقینی بنانے کے لیے پاک فوج اور رینجرز کی خدمات بھی طلب کی جائیں گی۔
انہوں نے ووٹرز پر زور دیا کہ وہ بلا خوف و خطر اپنے جمہوری حقِ رائے دہی کا استعمال کریں اور انتخابی عمل میں بھرپور شرکت کریں۔
جاری کردہ شیڈول کے مطابق امیدوار 9 جون سے 19 جون تک اپنے کاغذاتِ نامزدگی جمع کرا سکیں گے، جبکہ ان کی جانچ پڑتال 20 جون کو کی جائے گی۔ امیدواروں کی ابتدائی فہرست بھی 20 جون کو جاری کی جائے گی۔
انتخابی عمل کے دوران کاغذات نامزدگی سے متعلق اعتراضات پر اپیلوں کی سماعت 26 اور 27 جون کو ہوگی، جبکہ اپیلوں پر فیصلے 28 اور 29 جون کو سنائے جائیں گے۔ امیدوار 29 جون تک اپنے کاغذات واپس لے سکیں گے۔
الیکشن کمیشن کے مطابق امیدواروں کی حتمی فہرست یکم جولائی کو جاری کی جائے گی، جبکہ انتخابی نشانات 2 جولائی کو الاٹ کیے جائیں گے۔ اس کے بعد انتخابی مہم اپنے باضابطہ مرحلے میں داخل ہو جائے گی۔
آزاد کشمیر اسمبلی کے لیے ہونے والے یہ انتخابات خطے کی سیاسی سمت کے تعین میں اہم کردار ادا کریں گے، جہاں مختلف سیاسی جماعتیں اور آزاد امیدوار عوامی حمایت حاصل کرنے کے لیے میدان میں اتریں گے۔
