چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے ناروے کے وزیر خارجہ ایسپن بارتھ ایرڈے کی قیادت میں اعلیٰ سطحی وفد نے ملاقات کی۔
ملاقات جنرل ہیڈکوارٹرز (جی ایچ کیو) راولپنڈی میں ہوئی۔ اس دوران باہمی دلچسپی کے امور، علاقائی سکیورٹی اور پاک ناروے تعلقات پر تبادلہ خیال کیا گیا۔
آئی ایس پی آر کے مطابق فیلڈ مارشل سید عاصم منیر نے عالمی امن اور علاقائی استحکام سے متعلق پاکستان کا مؤقف پیش کیا۔
انہوں نے مشترکہ سکیورٹی چیلنجز سے نمٹنے کے لیے تعاون کی اہمیت پر زور دیا۔ انہوں نے باہمی کوششوں کو مزید مؤثر بنانے کی ضرورت بھی اجاگر کی۔
ناروے کے وزیر خارجہ ایسپن بارتھ ایرڈے نے علاقائی امن اور استحکام کے فروغ میں پاک فوج کے پیشہ ورانہ کردار کو سراہا۔
ملاقات میں دونوں جانب سے دوطرفہ تعلقات مزید مضبوط بنانے کے عزم کا اعادہ کیا گیا۔
فریقین نے دفاع اور سکیورٹی کے شعبوں میں تعاون بڑھانے پر بھی اتفاق کیا۔ ملاقات میں علاقائی امن اور مشترکہ سکیورٹی چیلنجز سے نمٹنے کے لیے باہمی رابطوں کی اہمیت بھی اجاگر کی گئی۔
