دوحہ: وفاقی وزیر داخلہ محسن نقوی نے قطر کے وزیر داخلہ اور کمانڈر داخلی سلامتی فورس (لخویا) شیخ خلیفہ بن حمد بن خلیفہ آل ثانی سے اہم ملاقات کی، جس میں دوطرفہ سکیورٹی تعاون، داخلی سلامتی اور باہمی شراکت داری کے فروغ سے متعلق امور پر تفصیلی تبادلہ خیال کیا گیا۔
ملاقات کے دوران دونوں وزرائے داخلہ نے پاکستان اور قطر کے درمیان سکیورٹی پارٹنرشپ کو مزید وسعت دینے اور وزارت داخلہ کی سطح پر تعاون کو مضبوط بنانے کے عزم کا اعادہ کیا۔ اس موقع پر خطے کی مجموعی صورتحال، امن و استحکام اور داخلی سلامتی کے شعبوں میں مشترکہ تعاون کو مزید مؤثر بنانے پر بھی اتفاق کیا گیا۔
وفاقی وزیر داخلہ محسن نقوی نے کہا کہ پاکستان، قطر کے ساتھ سکیورٹی، داخلی سلامتی اور دیگر باہمی دلچسپی کے شعبوں میں تعاون کو مزید مستحکم بنانے کے لیے پرعزم ہے اور دونوں ممالک کے درمیان قریبی روابط علاقائی امن و استحکام کے لیے اہم ہیں۔
ملاقات کے دوران محسن نقوی نے قطری وزیر داخلہ سے ان کے والد اور قطر کے سابق امیر شیخ حمد بن خلیفہ آل ثانی کے انتقال پر دلی تعزیت کا اظہار کیا اور قطر کی ترقی و خوشحالی کے لیے ان کی خدمات کو خراجِ عقیدت پیش کیا۔
اس موقع پر قطری وزیر داخلہ نے کہا کہ قطر، پاکستان کے ساتھ اپنے برادرانہ تعلقات کو انتہائی اہمیت دیتا ہے اور دونوں ممالک کے درمیان سکیورٹی، داخلی سلامتی اور دیگر شعبوں میں تعاون کو مزید فروغ دینے کے لیے مشترکہ کوششیں جاری رکھی جائیں گی۔
