اسلام آباد: پاکستان نے سعودی عرب پر ہونے والے ڈرون حملوں کی شدید الفاظ میں مذمت کرتے ہوئے انہیں خطے کے امن، سلامتی اور استحکام کے لیے سنگین خطرہ قرار دیا ہے۔
ترجمان دفتر خارجہ طاہر اندرابی نے اپنے بیان میں کہا کہ پاکستان سعودی عرب کے ساتھ مکمل یکجہتی کا اظہار کرتا ہے اور مملکت کی خودمختاری، علاقائی سالمیت، امن اور خوشحالی کے لیے اپنی غیر متزلزل حمایت کا اعادہ کرتا ہے۔
انہوں نے کہا کہ پاکستان ہر اس اقدام کی مخالفت کرتا ہے جو خطے کے امن و استحکام کو نقصان پہنچائے یا کشیدگی میں اضافے کا سبب بنے۔ ترجمان کے مطابق پاکستان خطے میں دیرپا امن، سلامتی اور استحکام کے فروغ کے لیے اپنی تعمیری کوششیں جاری رکھے گا۔
دفتر خارجہ نے اس عزم کا بھی اظہار کیا کہ پاکستان علاقائی استحکام کے لیے اپنے شراکت داروں کے ساتھ تعاون جاری رکھے گا اور ایسے تمام اقدامات کی حوصلہ شکنی کرے گا جو مشرق وسطیٰ میں امن کو متاثر کر سکتے ہیں۔
پاکستان نے ایک بار پھر اس بات پر زور دیا کہ تنازعات کے حل کے لیے سفارت کاری، مذاکرات اور بین الاقوامی قوانین کے احترام کو فروغ دینا ہی خطے میں پائیدار امن کا واحد مؤثر راستہ ہے۔
