اسلام آباد: پاکستان کی وزارت خارجہ نے پاکستان اور کویت کے درمیان دفاعی تعاون کے معاہدے کی توثیق کا خیرمقدم کرتے ہوئے اسے دونوں برادر ممالک کے درمیان دفاعی شراکت داری میں ایک اہم سنگِ میل قرار دیا ہے۔
وزارت خارجہ کے ترجمان نے اسلام آباد میں جاری بیان میں کہا کہ پاکستان، کویت کے ساتھ دفاعی تعاون کے معاہدے کی باضابطہ توثیق کا خیرمقدم کرتا ہے۔ یہ معاہدہ جون 2023 میں دونوں ممالک کے درمیان طے پایا تھا، جبکہ آج اس کی باضابطہ توثیق عمل میں آئی۔
ترجمان کے مطابق اس پیش رفت سے پاکستان اور کویت کے درمیان دفاعی تعلقات کو مزید مضبوط بنانے کے لیے ایک جامع ادارہ جاتی فریم ورک میسر آئے گا، جس کے ذریعے دونوں ممالک کے درمیان عسکری تعاون کو مزید وسعت دی جا سکے گی۔
وزارت خارجہ نے بتایا کہ پاکستان اور کویت کے درمیان دفاعی تعاون کی بنیاد 1980 کی دہائی کے اوائل میں رکھی گئی تھی، اور اب اس معاہدے کے ذریعے اس تعاون کو ایک مضبوط اور منظم ادارہ جاتی شکل دی گئی ہے۔
معاہدے کے تحت فوجی تربیت، عسکری تعلیم، مشترکہ فوجی مشقیں، دفاعی مہارت اور تجربات کا تبادلہ سمیت باہمی اتفاق سے طے کیے جانے والے دیگر شعبوں میں بھی تعاون کو فروغ دیا جائے گا۔
ترجمان نے کہا کہ اس دفاعی تعاون کے معاہدے سے دونوں ممالک کی مسلح افواج کے درمیان ادارہ جاتی روابط مزید مستحکم ہوں گے، جبکہ پاکستان اور کویت کے دیرینہ دفاعی تعلقات کو بھی نئی تقویت ملے گی۔
