ہائیڈل برگ (جرمنی): جرمنی کے تاریخی شہر ہائیڈل برگ میں دریائے نیکر کے کنارے شاعرِ مشرق علامہ محمد اقبال اور جرمن عظیم شاعر یوان وولف گانگ فان گوئٹے کی یاد میں ایک پروقار ادبی تقریب اور مشاعرے کا انعقاد کیا گیا، جس میں پاکستانی سفیر ثقلین سیدہ نے بطور مہمانِ خصوصی شرکت کی۔
تقریب اور مشاعرے کی صدارت جرمنی کی معروف سماجی و ادبی شخصیت سید اقبال حیدر نے کی، جبکہ وسیم بٹ (رکن سٹی کونسل، ہائیڈل برگ)، پروفیسر ہنس ہرڈر سمیت علمی، ادبی اور سماجی حلقوں سے تعلق رکھنے والی متعدد ممتاز شخصیات نے بھی شرکت کی۔
اپنے خطاب میں پاکستانی سفیر ثقلین سیدہ نے کہا کہ بیرونِ ملک اردو زبان، ادب اور پاکستانی ثقافت کے فروغ میں ایسی ادبی محافل اہم کردار ادا کرتی ہیں۔ انہوں نے کہا کہ جرمنی میں ادبی و ثقافتی سرگرمیاں دونوں ممالک کے عوام کو ایک دوسرے کے قریب لانے میں معاون ثابت ہو رہی ہیں۔
انہوں نے اس موقع پر بتایا کہ ہائیڈل برگ یونیورسٹی میں "علامہ اقبال چیئر” کی بحالی آخری مرحلے میں داخل ہو چکی ہے اور توقع ہے کہ اس اقدام سے پاکستان اور جرمنی کے درمیان تعلیمی، ادبی اور ثقافتی تعاون کو مزید فروغ ملے گا۔
تقریب کے دوران مقررین نے علامہ اقبال کے ہائیڈل برگ میں قیام، دریائے نیکر سے ان کی گہری وابستگی اور جرمن فلسفے و ادب سے ان کے فکری تعلق پر بھی روشنی ڈالی۔ شرکاء نے اس بات پر زور دیا کہ علامہ اقبال اور گوئٹے کی فکری میراث مشرق و مغرب کے درمیان علمی و ثقافتی مکالمے کی ایک روشن مثال ہے۔
ادبی نشست کے اختتام پر شعراء نے اپنا کلام پیش کیا، جبکہ شرکاء نے علامہ اقبال کی ادبی خدمات اور پاک۔جرمن ثقافتی روابط کے فروغ کے لیے اس نوعیت کی تقریبات کو نہایت اہم قرار دیا۔
