واشنگٹن: امریکی صدر ڈونلڈ ٹرمپ بدھ کے روز مشرق وسطیٰ میں ایرانی حملوں کے دوران ہلاک ہونے والے امریکی فوجی اہلکاروں کی منتقلی (Dignified Transfer) کی تقریب میں شرکت کریں گے۔
وائٹ ہاؤس کی جانب سے جاری کیے گئے صدر کے عوامی شیڈول کے مطابق یہ تقریب مقامی وقت کے مطابق صبح 11 بجے امریکی ریاست ڈیلاویئر کے ڈوور ایئر فورس بیس پر منعقد ہوگی، جہاں ہلاک ہونے والے فوجیوں کی میتیں سرکاری اعزاز کے ساتھ وصول کی جائیں گی۔
یہ تقریب امریکی فوج کی اس روایت کا حصہ ہے جس کے تحت بیرونِ ملک کارروائیوں میں جان کی قربانی دینے والے اہلکاروں کی میتیں وطن پہنچنے پر مکمل فوجی اعزاز کے ساتھ وصول کی جاتی ہیں۔ صدر کی شرکت کو متاثرہ فوجیوں اور ان کے اہلِ خانہ سے اظہارِ یکجہتی اور خراجِ عقیدت کے طور پر دیکھا جا رہا ہے۔
ایران اور امریکہ کے درمیان جاری کشیدگی کے تناظر میں یہ تقریب خاص اہمیت اختیار کر گئی ہے، جبکہ حالیہ حملوں میں متعدد امریکی فوجی ہلاک اور سینکڑوں زخمی ہونے کی اطلاعات سامنے آ چکی ہیں۔
