اسلام آباد: پاکستان اور ایران نے تعلیم، سائنس، تحقیق اور اعلیٰ تعلیم کے شعبوں میں دوطرفہ تعاون کو مزید مضبوط بنانے اور نئی شراکت داریوں کے آغاز پر اتفاق کرتے ہوئے باہمی روابط کے فروغ کے عزم کا اعادہ کیا ہے۔
وفاقی وزیر تعلیم نے اسلام آباد میں ایران کے وزیر سائنس، تحقیق و ٹیکنالوجی ڈاکٹر حسین سیمائی صراف سے ملاقات کی، جس میں دونوں ممالک کے درمیان تعلیمی اور سائنسی تعاون کو وسعت دینے سے متعلق مختلف امور پر تفصیلی تبادلہ خیال کیا گیا۔
ملاقات کے دوران پاکستان اور ایران نے جامعات، تحقیقی اداروں اور تعلیمی مراکز کے درمیان روابط مزید مستحکم کرنے پر اتفاق کیا۔ دونوں فریقوں نے اساتذہ کی تربیت، نصاب کی ترقی، مصنوعی ذہانت (AI)، ڈیجیٹل تعلیم اور جدید تعلیمی ٹیکنالوجی کے شعبوں میں مشترکہ تعاون بڑھانے کی ضرورت پر زور دیا۔
دونوں ممالک نے طلبہ اور اساتذہ کے تبادلوں، مشترکہ تحقیقی منصوبوں، علمی کانفرنسوں اور تعلیمی وظائف کے پروگراموں کو فروغ دینے پر بھی اتفاق کیا تاکہ تعلیمی و تحقیقی شعبوں میں باہمی استفادہ ممکن بنایا جا سکے۔
وفاقی وزیر تعلیم نے پاکستان۔ایران مشترکہ کمیشن کے تحت تعلیم سے متعلق کیے گئے فیصلوں پر مؤثر عمل درآمد کے لیے حکومت پاکستان کے عزم کا اعادہ کرتے ہوئے کہا کہ تعلیمی تعاون دونوں ممالک کے تعلقات کو مزید مستحکم بنانے میں اہم کردار ادا کرے گا۔
ایرانی وزیر سائنس، تحقیق و ٹیکنالوجی ڈاکٹر حسین سیمائی صراف نے حکومت پاکستان کی میزبانی کو سراہتے ہوئے تعلیم، تحقیق، اختراع اور جدید سائنسی شعبوں میں تعاون کو مزید فروغ دینے کے عزم کا اظہار کیا۔ ملاقات کے اختتام پر دونوں برادر ممالک نے اس بات پر اتفاق کیا کہ تعلیمی اداروں کے درمیان مستقل روابط، مشترکہ تحقیق اور سائنسی تعاون نہ صرف علمی ترقی بلکہ پائیدار ترقی، عوامی روابط اور مستقبل کی نئی شراکت داریوں کے فروغ کے لیے بھی ناگزیر ہیں۔
