اسلام آباد: نائب وزیراعظم و وزیر خارجہ اسحاق ڈار 33ویں آسیان ریجنل فورم (ASEAN Regional Forum) کے وزارتی اجلاس میں شرکت کے لیے فلپائن روانہ ہوگئے ہیں، جہاں وہ 22 اور 23 جولائی کو منیلا میں ہونے والے اجلاس میں پاکستان کی نمائندگی کریں گے۔
ترجمان دفتر خارجہ کے مطابق اسحاق ڈار اجلاس کے دوران علاقائی اور عالمی سیاسی و سیکیورٹی امور پر پاکستان کا مؤقف پیش کریں گے اور ایشیا پیسیفک خطے میں امن، استحکام، باہمی تعاون اور سفارتی مکالمے کے لیے پاکستان کے عزم کا اعادہ کریں گے۔
ترجمان نے بتایا کہ آسیان ریجنل فورم کے موقع پر نائب وزیراعظم مختلف شریک ممالک کے وزرائے خارجہ اور اعلیٰ حکام سے دوطرفہ ملاقاتیں بھی کریں گے، جن میں باہمی تعلقات، علاقائی تعاون، تجارت، سرمایہ کاری اور مشترکہ دلچسپی کے دیگر شعبوں پر تبادلہ خیال کیا جائے گا۔
دفتر خارجہ کے مطابق اسحاق ڈار اپنے دورۂ منیلا کے دوران اہم سفارتی روابط کو مزید مضبوط بنانے اور مختلف ممالک کے ساتھ دوطرفہ تعاون کو فروغ دینے کے لیے متعدد اعلیٰ سطحی ملاقاتیں کریں گے۔
واضح رہے کہ آسیان ریجنل فورم ایشیا پیسیفک خطے میں سلامتی، استحکام، سفارت کاری اور علاقائی تعاون کے فروغ کے لیے ایک اہم کثیرالجہتی پلیٹ فارم تصور کیا جاتا ہے، جہاں مختلف ممالک کے وزرائے خارجہ علاقائی اور عالمی چیلنجز پر تبادلہ خیال کرتے ہیں۔
