پاکستان اور بنگلہ دیش کے تعلقات میں نئی پیش رفت، اسحاق ڈار اور خلیل الرحمٰن کی اہم ملاقات

منیلا میں جاری 33ویں آسیان ریجنل فورم (ARF) کے وزارتی اجلاس کے موقع پر پاکستان کے نائب وزیراعظم و وزیر خارجہ سینیٹر محمد اسحاق ڈار نے بنگلہ دیش کے وزیر خارجہ اور اقوام متحدہ کی جنرل اسمبلی کے 81ویں اجلاس کے نومنتخب صدر خلیل الرحمٰن سے اہم ملاقات کی۔

دفتر خارجہ کے مطابق ملاقات میں دونوں رہنماؤں نے پاکستان اور بنگلہ دیش کے درمیان دوطرفہ تعلقات میں حالیہ مثبت پیش رفت کا جائزہ لیا اور گزشتہ سال اسحاق ڈار کے بنگلہ دیش کے دورے کے بعد تعلقات میں آنے والی نئی رفتار کو سراہا۔ دونوں فریقین نے مختلف شعبوں میں تعاون کو مزید فروغ دینے اور دوطرفہ روابط کو مضبوط بنانے کے عزم کا اعادہ کیا۔

ملاقات کے دوران دونوں وزرائے خارجہ نے عوامی سطح پر بڑھتے ہوئے تبادلوں، تجارتی و سفارتی روابط اور رواں سال براہِ راست پروازوں کے آغاز کے بعد بہتر ہونے والے رابطوں کا خیرمقدم کیا۔ انہوں نے اس مثبت پیش رفت کو برقرار رکھنے اور باہمی تعاون کو مزید وسعت دینے پر اتفاق بھی کیا۔

اس موقع پر دونوں رہنماؤں نے خطے کی صورتحال، عالمی امور اور باہمی دلچسپی کے مختلف علاقائی و بین الاقوامی موضوعات پر بھی تفصیلی تبادلہ خیال کیا اور اہم عالمی فورمز پر تعاون جاری رکھنے کے عزم کا اظہار کیا۔