اسلام آباد: اٹلی میں مبینہ طور پر چار پاکستانی کسانوں کے ہولناک قتل کے واقعے پر پاکستان کے دفتر خارجہ نے ردعمل دیتے ہوئے کہا ہے کہ جنوبی اٹلی میں ایک جلی ہوئی وین سے چار افراد کی لاشیں برآمد ہوئی ہیں، تاہم اس مرحلے پر جاں بحق افراد کی شہریت کی حتمی تصدیق نہیں ہو سکی۔
ترجمان دفتر خارجہ کے مطابق ابتدائی اطلاعات سے عندیہ ملتا ہے کہ ہلاک ہونے والے افراد پاکستانی نژاد ہو سکتے ہیں، لیکن ان کی شناخت اور شہریت کے تعین کے لیے مقامی حکام کی تحقیقات جاری ہیں۔
دفتر خارجہ نے بتایا کہ واقعے کے بعد اٹلی میں پاکستانی سفارتخانہ متحرک ہو گیا ہے اور مقامی پولیس و متعلقہ اداروں کے ساتھ مسلسل رابطے میں ہے تاکہ حقائق سامنے لائے جا سکیں اور متاثرہ افراد کے بارے میں درست معلومات حاصل کی جا سکیں۔
ترجمان کا کہنا تھا کہ مقامی قانون نافذ کرنے والے ادارے واقعے کے تمام پہلوؤں کا جائزہ لے رہے ہیں اور اس بات کی تحقیقات کی جا رہی ہیں کہ آیا یہ واقعہ کسی مجرمانہ کارروائی کا نتیجہ ہے یا اس کے پس منظر میں کوئی اور عوامل کارفرما ہیں۔
پاکستانی سفارتی حکام نے یقین دہانی کرائی ہے کہ تحقیقات میں پیش رفت کے ساتھ مزید معلومات عوام کے سامنے لائی جائیں گی۔ دفتر خارجہ صورتحال پر گہری نظر رکھے ہوئے ہے اور اگر متاثرین پاکستانی شہری ثابت ہوئے تو ان کے اہل خانہ کو ہر ممکن سفارتی اور قونصلر معاونت فراہم کی جائے گی۔
یہ واقعہ اٹلی میں مقیم پاکستانی کمیونٹی کے لیے تشویش کا باعث بن گیا ہے، جبکہ مقامی حکام واقعے کی وجوہات اور ذمہ داران تک پہنچنے کے لیے شواہد اکٹھے کرنے میں مصروف ہیں۔
