چین نے عراق، قبرص اور پاناما میں نئے سفیروں کا تقرر کر دیا

بیجنگ: چین کی حکومت نے نیشنل پیپلز کانگریس کی قائمہ کمیٹی کے فیصلے کے مطابق تین مختلف ممالک میں نئے سفیروں کی تقرری کا اعلان کر دیا ہے۔

چینی ذرائع ابلاغ کے مطابق شیانگ بو کو عراق میں چین کا نیا سفیر مقرر کیا گیا ہے، جہاں وہ چوئی وی کی جگہ اپنی ذمہ داریاں سنبھالیں گے۔

اسی طرح یانگ یون ڈونگ کو قبرص میں چین کا نیا سفیر تعینات کیا گیا ہے۔ وہ لیو یان تاؤ کی جگہ سفارتی فرائض انجام دیں گے۔

دوسری جانب ژانگ شیانگ یان کو پاناما میں چین کا نیا سفیر مقرر کیا گیا ہے، جہاں وہ شو شویوآن کی جگہ اپنی ذمہ داریاں سنبھالیں گے۔

چینی حکام کے مطابق یہ تقرریاں نیشنل پیپلز کانگریس کی قائمہ کمیٹی کی منظوری کے بعد عمل میں آئی ہیں اور ان کا مقصد متعلقہ ممالک کے ساتھ چین کے سفارتی تعلقات، اقتصادی تعاون اور دوطرفہ روابط کو مزید مضبوط بنانا ہے۔

چین حالیہ برسوں میں مختلف خطوں میں اپنی سفارتی موجودگی اور بین الاقوامی تعاون کو وسعت دینے کے لیے سفارتی سطح پر سرگرم کردار ادا کر رہا ہے، جبکہ نئے سفیروں کی تعیناتی بھی اسی پالیسی کا حصہ سمجھی جا رہی ہے۔