سینٹ پیٹرز برگ: روس کے شہر Saint Petersburg میں جاری 14ویں سینٹ پیٹرز برگ انٹرنیشنل لیگل فورم (ILF) 2026 میں پاکستان کی اعلیٰ عدالتی قیادت نے شرکت کرتے ہوئے عالمی قانونی تعاون، انصاف کی فراہمی اور آئینی امور سے متعلق اہم مباحث میں حصہ لیا۔
فورم میں چیف جسٹس یحیٰ آفریدی اور وفاقی آئینی عدالت کے چیف جسٹس امین الدین خان نے روس میں پاکستان کے سفیر فیصل نیاز ترمذی کے ہمراہ شرکت کی۔
بین الاقوامی قانونی فورم میں مختلف ممالک کے چیف جسٹس صاحبان، اعلیٰ عدالتی ججز، قانونی ماہرین، حکومتی نمائندگان اور بین الاقوامی اداروں کے وفود شریک ہیں۔ فورم کے دوران قانون کی حکمرانی، عدالتی اصلاحات، آئینی معاملات، انصاف تک رسائی اور عالمی قانونی تعاون سمیت متعدد اہم موضوعات پر تبادلہ خیال کیا جا رہا ہے۔
پاکستانی عدالتی قیادت کی شرکت کو پاکستان اور روس کے درمیان ادارہ جاتی روابط، قانونی شعبے میں تعاون اور بین الاقوامی عدالتی مکالمے کے فروغ کے تناظر میں اہم پیش رفت قرار دیا جا رہا ہے۔ ماہرین کے مطابق ایسے فورمز مختلف ممالک کے عدالتی نظاموں کے درمیان تجربات اور بہترین طریقہ کار کے تبادلے کا مؤثر ذریعہ ثابت ہوتے ہیں۔
فورم کے پہلے روز مختلف ممالک کے وفود کے درمیان دوطرفہ ملاقاتیں بھی ہوئیں، جن میں قانونی تعاون، عدالتی تربیت اور بین الاقوامی قانون سے متعلق امور پر گفتگو کی گئی۔ فورم کے اختتامی مرحلے میں منعقدہ پلینری سیشن میں عالمی قانونی چیلنجز، انصاف کے نظام کو درپیش مسائل اور مستقبل کے تعاون کے امکانات پر تفصیلی غور کیا گیا۔
مبصرین کے مطابق اس فورم میں پاکستان کی فعال شرکت عالمی سطح پر ملک کے عدالتی اداروں کے کردار کو اجاگر کرنے اور بین الاقوامی قانونی برادری کے ساتھ روابط مضبوط بنانے میں معاون ثابت ہو سکتی ہے۔
