اسلام آباد: آزاد جموں و کشمیر کے آئندہ عام انتخابات سے قبل اہم سیاسی پیش رفت سامنے آئی ہے، جہاں کوٹلی سے پاکستان پیپلز پارٹی اور پاکستان مسلم لیگ (ن) کے دو امیدواروں نے استحکام پاکستان پارٹی (آئی پی پی) میں شمولیت کا اعلان کر دیا۔
تفصیلات کے مطابق ایل اے-8 سے امیدوار ملک ذوالفقار علی اور ایل اے-10 سے ملک محمد یوسف نے استحکام پاکستان پارٹی کے صدر عبدالعلیم خان سے ملاقات کی اور پارٹی میں شمولیت اختیار کر لی۔
عبدالعلیم خان نے نئے شامل ہونے والے رہنماؤں اور امیدواروں کا خیر مقدم کرتے ہوئے کہا کہ استحکام پاکستان پارٹی آزاد کشمیر کے عوام کو درپیش مسائل کے دیرپا حل کے لیے عملی اقدامات کرے گی۔
انہوں نے کہا کہ بہتر انفراسٹرکچر کی ترقی کے ذریعے روزگار کے نئے مواقع پیدا کیے جائیں گے اور عوامی محرومیوں کے خاتمے کو پارٹی کی اولین ترجیح بنایا جائے گا۔
صدر آئی پی پی نے اس موقع پر اعلان کیا کہ استحکام پاکستان پارٹی آزاد کشمیر کے آئندہ عام انتخابات میں بھرپور انداز میں حصہ لے گی اور ہر حلقے میں مضبوط امیدوار میدان میں اتارے گی۔
اس موقع پر آزاد کشمیر کے مختلف بلدیاتی نمائندوں، سماجی و سیاسی شخصیات نے بھی عبدالعلیم خان سے ملاقات کی۔ پارٹی میں شامل ہونے والے رہنماؤں کو عبدالعلیم خان نے استحکام پاکستان پارٹی کا پرچم پہنایا۔
تقریب میں استحکام پاکستان پارٹی کے رکن قومی اسمبلی عون چودھری بھی موجود تھے۔
ملاقات میں مسلم لیگ (ن) کے رہنما ملک محمد الیاس، چوہدری امیر قابل، ملک نظام اقبال منہاس، ملک محمد مشتاق، ملک سرمد علی، چوہدری محمد اشرف، ماجد ملک ایڈووکیٹ، ملک خالد محمود اور سابق صدر اساتذہ تنظیم حافظ کاظم ملک سمیت متعدد سیاسی و سماجی شخصیات نے بھی شرکت کی۔
