لندن: پاکستانی اداکارہ، میزبان اور گلوکارہ فضا علی کو خواتین کے حقوق کے فروغ، سماجی مسائل پر مؤثر آواز بلند کرنے اور معاشرتی شعور اجاگر کرنے میں نمایاں خدمات کے اعتراف میں برطانوی پارلیمنٹ میں خصوصی اعزاز سے نواز دیا گیا۔
اعزازی تقریب میں مختلف شعبہ ہائے زندگی سے تعلق رکھنے والی ممتاز شخصیات نے شرکت کی، جنہوں نے فضا علی کی سماجی خدمات اور خواتین کو درپیش مسائل کو اجاگر کرنے کے لیے ان کی مسلسل کاوشوں کو سراہتے ہوئے انہیں خراجِ تحسین پیش کیا۔
اعزاز وصول کرنے کے بعد اپنے خطاب میں فضا علی نے کہا کہ یہ اعزاز صرف ان کی ذاتی کامیابی نہیں بلکہ ہر اس خاتون کے لیے حوصلہ افزا پیغام ہے جو اپنے حقوق، بااختیار مستقبل اور معاشرے میں مثبت تبدیلی کے لیے جدوجہد کر رہی ہے۔
انہوں نے اس اعزاز کو پاکستان کی تمام خواتین کے نام کرتے ہوئے کہا کہ وہ مستقبل میں بھی خواتین کے حقوق، سماجی انصاف اور عوامی مسائل پر اپنی آواز بلند کرتی رہیں گی۔
فضا علی نے اس موقع پر اس امید کا اظہار بھی کیا کہ خواتین کو بااختیار بنانے اور معاشرتی شعور میں اضافے کے لیے مشترکہ کوششیں مزید مضبوط ہوں گی، تاکہ ایک زیادہ مساوی اور ترقی یافتہ معاشرہ تشکیل دیا جا سکے۔
تجزیہ کاروں کے مطابق برطانوی پارلیمنٹ میں کسی پاکستانی فنکارہ کو سماجی خدمات کے اعتراف میں اعزاز دیا جانا نہ صرف ان کی انفرادی کامیابی ہے بلکہ پاکستان کی ثقافتی اور سماجی نمائندگی کے حوالے سے بھی ایک مثبت پیش رفت تصور کی جا رہی ہے۔
