امریکہ کی ہرمزگان میں بمباری، اہم پل اور رہائشی علاقے تباہ؛ متعدد شہری ہلاک، ایران کا سلامتی کونسل سے نوٹس لینے کا مطالبہ

نیویارک/تہران: اقوامِ متحدہ میں ایران کے مستقل مندوب امیر سعید ایروانی نے اقوامِ متحدہ کے سیکرٹری جنرل انتونیو گوتریش اور سلامتی کونسل کے صدر کو ایک ہنگامی خط ارسال کیا ہے، جس میں ایران کے جنوبی صوبے ہرمزگان میں سویلین انفراسٹرکچر پر ہونے والے مبینہ امریکی حملوں کی شدید الفاظ میں مذمت کی گئی ہے۔ بی بی سی کی رپورٹ کے مطابق، ایرانی سفیر نے خط میں موقف اختیار کیا ہے کہ رہائشی علاقوں، پلوں اور ریلوے اسٹیشنوں کو نشانہ بنانا اقوامِ متحدہ کے چارٹر کے آرٹیکل 2(4) کی ‘کھلی خلاف ورزی’ ہے، جو بین الاقوامی قانون کے تحت طاقت کے استعمال یا اس کی دھمکی دینے کی صریح ممانعت کرتا ہے۔

خط میں امریکی حملوں کی تفصیلات بیان کرتے ہوئے سفیر سعید ایروانی نے بتایا کہ جمعرات کی رات اور جمعہ کی صبح ہونے والی اس بمباری کے نتیجے میں بندر عباس اور کہورستان بندر خمیر کے راستوں پر واقع کئی اہم ترین اور سلیون روابط کے پل مکمل طور پر تباہ ہو گئے ہیں۔ ایرانی مندوب کے مطابق، ایک پل پر ہونے والے حملے کی زد میں آ کر عام شہریوں کی گاڑی تباہ ہوئی، جس کے نتیجے میں سات معصوم شہری ہلاک اور نو دیگر شدید زخمی ہوئے۔ اس کے علاوہ، بندر عباس کے ایک گنجان آباد رہائشی علاقے کو بھی نشانہ بنایا گیا، جہاں ایک شہری کی ہلاکت اور آٹھ افراد کے زخمی ہونے کی تصدیق کی گئی ہے۔ ایران نے ان حملوں کو بین الاقوامی قوانین کی سنگین پامالی قرار دیتے ہوئے عالمی ادارے سے فوری مداخلت کی اپیل کی ہے۔