حکومت آزاد جموں و کشمیر نے جموں کشمیر جوائنٹ عوامی ایکشن کمیٹی (جے اے اے سی) کو کالعدم تنظیم قرار دیتے ہوئے اسے انسداد دہشت گردی ایکٹ 2014 کے فرسٹ شیڈول میں شامل کر دیا ہے۔
حکومت آزادکشمیر کی جانب سے جاری کردہ نوٹیفکیشن کے مطابق جموں کشمیر جوائنٹ عوامی ایکشن کمیٹی اور اس کے دیگر ناموں کو بھی کالعدم تنظیموں کی فہرست میں شامل کیا گیا ہے۔ حکام کے مطابق یہ فیصلہ ریاست کے امن و امان، داخلی سکیورٹی اور عوامی تحفظ سے متعلق خدشات کو مدنظر رکھتے ہوئے کیا گیا۔
نوٹیفکیشن میں کہا گیا ہے کہ تنظیم کو انسداد دہشت گردی ایکٹ 2014 کے تحت فرسٹ شیڈول میں شامل کرنے کے بعد اس کی سرگرمیوں، اجتماعات، مالی معاونت اور دیگر متعلقہ امور پر قانون کے مطابق پابندیاں عائد ہوں گی۔
آزاد کشمیر حکومت کا مؤقف ہے کہ یہ اقدام ریاست میں امن و استحکام برقرار رکھنے اور کسی بھی ممکنہ سکیورٹی خطرے سے نمٹنے کے لیے اٹھایا گیا ہے۔ حکام کے مطابق عوام کے جان و مال کے تحفظ اور قانون کی بالادستی کو یقینی بنانا حکومت کی اولین ذمہ داری ہے۔
حکومتی نوٹیفکیشن کے بعد جے اے اے سی کی قانونی حیثیت ختم ہو گئی ہے اور تنظیم سے وابستہ سرگرمیوں پر متعلقہ قوانین کا اطلاق ہوگا۔ تاہم اس فیصلے پر تنظیم یا اس کے نمائندوں کی جانب سے باضابطہ ردعمل سامنے نہیں آیا۔
