خیبر پختونخواہ کلچرل اتھارٹی اور چائنہ ونڈو نے پاک چین دوستی کی 75ویں سالگرہ کے موقع پر مشترکہ طور پر ڈریگن بوٹ فیسٹیول کے انعقاد کا فیصلہ کیا ہے، جو پہلی مرتبہ خیبرپختونخوا میں منعقد کیا جائے گا۔
اس حوالے سے منعقدہ اجلاس کی صدارت ڈائریکٹر کلچر اینڈ ٹورازم حلیمہ اقبال نے کی جبکہ چائنہ ونڈو کے ایڈمنسٹریٹر امجد اقبال ملک بھی اجلاس میں شریک تھے۔
اجلاس میں بتایا گیا کہ ڈریگن بوٹ فیسٹیول چین کا ایک روایتی اور انتہائی مقبول ثقافتی و کھیلوں کا ایونٹ ہے، جسے پہلی بار خیبرپختونخوا کے ضلع چارسدہ میں سردریاب کے مقام پر دریائے کابل پر 14 جون کو منعقد کیا جائے گا۔
فیسٹیول کے دوران شرکاء روایتی کشتیوں میں چپوؤں کے ذریعے مقابلہ کریں گے۔ منتظمین کے مطابق اس ایونٹ کا مقصد پاک چین دوستی کو مزید مضبوط بنانا اور خیبرپختونخوا کے عوام کی جانب سے چینی عوام کی خوشیوں میں شرکت کا اظہار کرنا ہے۔
چائنہ ونڈو کے ایڈمنسٹریٹر امجد عزیز ملک نے بتایا کہ شرکاء کی حفاظت اور ایونٹ کے کامیاب انعقاد کے لیے متعلقہ اداروں کے ساتھ متعدد اجلاس منعقد کیے جا چکے ہیں اور تمام انتظامات کو حتمی شکل دی جا رہی ہے۔
ڈائریکٹر کلچر اینڈ ٹورازم حلیمہ اقبال نے کہا کہ صوبائی محکمہ ثقافت و سیاحت دونوں ممالک کی ثقافتی روایات کو اجاگر کرنے اور سیاحت کے فروغ کے لیے سرگرم عمل ہے۔ انہوں نے کہا کہ وزیراعلیٰ کے مشیر برائے سیاحت و ثقافت عادل اقبال، سیکرٹری سادات حسن اور ڈائریکٹر جنرل سی ٹی اے شاہد خان کی ہدایات کے مطابق اس تقریب کو کامیاب بنانے کے لیے تمام وسائل بروئے کار لائے جائیں گے۔
انہوں نے مزید کہا کہ پاکستان میں پہلی مرتبہ منعقد ہونے والا یہ فیسٹیول پاک چین تعلقات، ثقافتی ہم آہنگی اور سیاحتی سرگرمیوں کے فروغ کے لیے ایک اہم سنگِ میل ثابت ہوگا اور خیبرپختونخوا سے دنیا کو ایک مثبت پیغام جائے گا۔
