آزاد کشمیر الیکشن کا شیڈول تبدیل، فوج کی نگرانی میں تین مراحل میں پولنگ ہوگی

مظفرآباد: آزاد جموں و کشمیر الیکشن کمیشن نے آئندہ ہونے والے انتخابات کا شیڈول تبدیل کرتے ہوئے پولنگ کو تین مراحل میں کرانے کا اعلان کر دیا ہے۔

چیف الیکشن کمشنر آزاد کشمیر غلام مصطفیٰ مغل نے مظفرآباد میں پریس کانفرنس کرتے ہوئے بتایا کہ پہلے مرحلے میں 27 جولائی کو میرپور ڈویژن میں پولنگ ہوگی، جبکہ دوسرے مرحلے میں 2 اگست کو مظفرآباد ڈویژن میں ووٹنگ کرائی جائے گی۔

انہوں نے مزید بتایا کہ تیسرے اور آخری مرحلے میں 10 اگست کو پونچھ ڈویژن میں پولنگ ہوگی، جبکہ مہاجرین کی 12 نشستوں پر بھی انتخابات 2 اگست کو مظفرآباد ڈویژن کے ساتھ ہی منعقد کیے جائیں گے۔

چیف الیکشن کمشنر کے مطابق انتخابات کو مرحلہ وار کرانے کا فیصلہ پاک فوج کی نفری کی دستیابی کے پیش نظر کیا گیا ہے، جبکہ تمام پولنگ کا عمل پاک فوج کی نگرانی میں مکمل کیا جائے گا تاکہ شفاف، پرامن اور منظم انتخابات یقینی بنائے جا سکیں۔

غلام مصطفیٰ مغل نے کہا کہ الیکشن کمیشن نے تمام انتظامات مکمل کر لیے ہیں اور نئے شیڈول کے مطابق انتخابی عمل بروقت مکمل کیا جائے گا۔

واضح رہے کہ ایک روز قبل چیف الیکشن کمشنر نے کہا تھا کہ آزاد کشمیر میں انتخابات مقررہ وقت پر ہوں گے اور اگر تاریخ میں تبدیلی کرنا مقصود ہوتی تو اس کا فیصلہ پہلے ہی کر لیا جاتا۔