رباط: مراکش نے اپنی 655 میل (1055 کلومیٹر) طویل ساحلی شاہراہ کو امریکی صدر ڈونلڈ ٹرمپ کے نام سے منسوب کر دیا ہے۔ عرب میڈیا کے مطابق یہ فیصلہ مراکش کے بادشاہ محمد ششم کے جاری کردہ شاہی فرمان کے تحت کیا گیا۔
شاہی فرمان کے مطابق تزنیت سے جنوبی شہر داخلہ تک قائم شاہراہ کا نام اب "ڈونلڈ جے ٹرمپ شاہراہ” رکھا گیا ہے۔ یہ شاہراہ پہلے عام طور پر تزنیت-داخلہ ایکسپریس وے کے نام سے جانی جاتی تھی۔
رپورٹس کے مطابق اس منصوبے کی لمبائی 655 میل (1055 کلومیٹر) ہے جبکہ اس پر تقریباً ایک ارب امریکی ڈالر لاگت آئی ہے۔ یہ شاہراہ مراکش کے جنوبی ساحلی علاقوں کو مرکزی شاہراہوں سے جوڑنے والا ایک اہم انفراسٹرکچر منصوبہ سمجھی جاتی ہے۔
امریکی صدر ڈونلڈ ٹرمپ نے اس فیصلے پر ردعمل دیتے ہوئے مراکش کے بادشاہ محمد ششم کا شکریہ ادا کیا۔ اپنے پیغام میں انہوں نے کہا کہ وہ اس "عظیم اعزاز” پر شاہ مراکش کے شکر گزار ہیں۔
ٹرمپ نے مزید کہا کہ انہیں امید ہے کہ مستقبل قریب میں انہیں اس شاندار شاہراہ پر سفر کرنے کا موقع ملے گا۔
یہ اعلان ایسے وقت میں سامنے آیا ہے جب مراکش اور امریکا کے درمیان سفارتی اور اقتصادی تعلقات کو مضبوط بنانے کے لیے مختلف سطحوں پر رابطے جاری ہیں۔
