کیف: یوکرین کے وزیر خارجہ آندری سیبیہا نے بحیرۂ کیسپیئن میں حالیہ حملے کے بعد ایران کے بیانات پر سخت ردعمل دیتے ہوئے کہا ہے کہ ایران خود کو مظلوم ظاہر نہ کرے، کیونکہ وہ روس کو ہتھیار فراہم کر کے یوکرین کے خلاف جنگ میں براہِ راست شریک ہے۔
اپنے بیان میں آندری سیبیہا نے کہا کہ ایرانی حکومت روس کی جانب سے یوکرین کے خلاف جاری جارحیت میں عملی کردار ادا کر رہی ہے اور ماسکو کو ایسے ہتھیار فراہم کر رہی ہے جو یوکرینی شہریوں کی ہلاکت کا سبب بن رہے ہیں۔
انہوں نے کہا کہ ایران روس کی مجرمانہ جنگ کو تقویت دے رہا ہے، اس لیے اس کے پاس خود کو مظلوم ظاہر کرنے کا کوئی جواز نہیں۔
یوکرینی وزیر خارجہ نے مزید کہا کہ ایران اقوام متحدہ کے منشور کا حوالہ دے کر اپنی دھمکیوں یا مؤقف کا دفاع نہیں کر سکتا، کیونکہ اس کے اقدامات خود بین الاقوامی قوانین اور امن کے اصولوں سے متصادم ہیں۔
یہ بیان ایسے وقت میں سامنے آیا ہے جب بحیرۂ کیسپیئن میں ایک ایرانی بحری جہاز پر حملے کے بعد ایران اور یوکرین کے درمیان بیانات کی جنگ میں شدت آ گئی ہے۔
