اسلام آباد: فرانس کے قومی دن (باسٹیل ڈے) کی تقریب اسلام آباد میں منعقد ہوئی، جہاں پاکستان اور فرانس نے دوطرفہ تعلقات کو مزید مضبوط بنانے، اقتصادی تعاون کے فروغ اور علاقائی و عالمی امن کے لیے مشترکہ کوششیں جاری رکھنے کے عزم کا اعادہ کیا۔
تقریب میں وفاقی وزیر خزانہ محمد اورنگزیب نے بطور مہمانِ خصوصی شرکت کی، جبکہ پاکستان میں فرانس کے سفیر نکولس گیلے، اقوام متحدہ کے انڈر سیکرٹری ٹام فلیچر، سفارت کاروں، سرکاری حکام، کاروباری شخصیات اور دونوں ممالک کی کمیونٹیز کے نمائندوں نے بھی شرکت کی۔
اپنے خطاب میں وزیر خزانہ محمد اورنگزیب نے کہا کہ پاکستان فرانس کے ساتھ اپنے دیرینہ اور دوستانہ تعلقات کو انتہائی اہمیت دیتا ہے اور تجارت، سرمایہ کاری، تعلیم، ثقافت، دفاع اور دیگر شعبوں میں تعاون کو مزید وسعت دینے کے لیے پرعزم ہے۔
انہوں نے کہا کہ پاکستان مشرق وسطیٰ میں امن اور استحکام کے لیے اپنی سفارتی کوششیں جاری رکھے گا اور علاقائی کشیدگی کے خاتمے کے لیے تعمیری کردار ادا کرتا رہے گا۔
وزیر خزانہ نے یورپی یونین کے جنرلائزڈ سسٹم آف پریفرنسز پلس (GSP+) کا خصوصی ذکر کرتے ہوئے کہا کہ اس اسکیم سے پاکستان کی برآمدات، صنعتی ترقی اور روزگار کے مواقع میں نمایاں اضافہ ہوا ہے، جبکہ فرانس اس حوالے سے یورپی یونین کا ایک اہم شراکت دار ہے۔
پاکستان میں فرانس کے سفیر نکولس گیلے نے اپنے خطاب میں پاکستان میں اپنے ساڑھے چار سالہ سفارتی دور کو یاد کرتے ہوئے دوطرفہ تعلقات میں ہونے والی پیش رفت پر اطمینان کا اظہار کیا۔ انہوں نے امن، استحکام اور علاقائی ہم آہنگی کے فروغ کے لیے پاکستان کی کوششوں کو سراہا۔
انہوں نے عالمی امور پر فرانس کے مؤقف کا اعادہ کرتے ہوئے یوکرین میں جاری جنگ پر تشویش کا اظہار کیا اور فلسطینی عوام کے حقوق کی حمایت کرتے ہوئے مسئلہ فلسطین کے منصفانہ اور پائیدار حل کی ضرورت پر زور دیا۔
تقریب کے دوران دونوں ممالک کے حکام نے اس بات پر اتفاق کیا کہ عوامی روابط، ثقافتی تبادلے، اقتصادی شراکت داری اور سفارتی تعاون پاکستان اور فرانس کے تعلقات کو مزید مستحکم بنانے میں اہم کردار ادا کریں گے۔
تقریب میں اس امید کا اظہار بھی کیا گیا کہ مضبوط اقتصادی روابط، جی ایس پی پلس کے تحت تعاون اور مسلسل سفارتی رابطے مستقبل میں دونوں ممالک کے درمیان نئی شراکت داریوں کی راہ ہموار کریں گے اور علاقائی و عالمی استحکام کے فروغ میں معاون ثابت ہوں گے۔
فرانس کا قومی دن، جسے باسٹیل ڈے بھی کہا جاتا ہے، ہر سال 14 جولائی کو 1789 کے فرانسیسی انقلاب کی یاد میں منایا جاتا ہے، جو آزادی، مساوات اور اخوت کی جمہوری اقدار کی علامت سمجھا جاتا ہے۔
