لاہور: پاکستان میں پرتگال کے سفیر پاؤلو گیڈس ڈومینگیس نے اپنے سرکاری دورۂ لاہور کے دوران گورنر پنجاب سردار سلیم حیدر خان سے بشکریہ ملاقات کی، جس میں پاکستان اور پرتگال کے درمیان دوطرفہ تعلقات کو مزید مستحکم بنانے اور مختلف شعبوں میں تعاون بڑھانے پر تبادلہ خیال کیا گیا۔
ملاقات کے دوران دونوں رہنماؤں نے پاکستان اور پرتگال کے درمیان دیرینہ دوستانہ تعلقات کا اعادہ کرتے ہوئے باہمی مفادات کے شعبوں میں تعاون کو نئی جہت دینے کے عزم کا اظہار کیا۔
گفتگو میں تجارت، سرمایہ کاری، اعلیٰ تعلیم، سیاحت، ثقافتی روابط، قابلِ تجدید توانائی، زراعت اور عوامی سطح پر روابط (People-to-People Contacts) کے فروغ پر خصوصی توجہ دی گئی۔ اس موقع پر پنجاب کو پاکستان کے اہم معاشی اور صنعتی مرکز کے طور پر اجاگر کرتے ہوئے سرمایہ کاری اور کاروباری تعاون کے نئے مواقع پر بھی تبادلہ خیال کیا گیا۔
پرتگال کے سفیر پاؤلو گیڈس ڈومینگیس نے لاہور میں پرتپاک استقبال اور مہمان نوازی پر گورنر پنجاب کا شکریہ ادا کیا اور اس عزم کا اعادہ کیا کہ پرتگال، خصوصاً صوبہ پنجاب کے ساتھ اپنے تعلقات اور شراکت داری کو مزید مضبوط بنانے کے لیے عملی اقدامات جاری رکھے گا۔
دونوں فریقوں نے اس بات پر اتفاق کیا کہ باہمی تعاون کے فروغ سے نہ صرف پاکستان اور پرتگال کے تعلقات مزید مستحکم ہوں گے بلکہ تجارت، سرمایہ کاری اور تعلیمی و ثقافتی شعبوں میں بھی نئے مواقع پیدا ہوں گے۔
