برسلز: یورپی یونین نے غزہ کی انسانی صورتحال اور جلد بحالی کے منصوبوں کی معاونت کے لیے تقریباً ایک ارب ڈالر مالیت کے امدادی اقدام کا آغاز کر دیا ہے۔
یورپی کمیشن کے مطابق "ٹیم غزہ انیشیٹو” کے تحت غزہ کے عوام کے لیے جاری اور مستقبل کے ابتدائی بحالی منصوبوں کی مالی اور تکنیکی معاونت فراہم کی جائے گی۔ اس پروگرام کی مجموعی مالیت 883.6 ملین یورو (تقریباً ایک ارب امریکی ڈالر) بتائی گئی ہے۔
یہ اقدام برسلز میں منعقدہ فلسطین ڈونر گروپ کے اجلاس کے موقع پر شروع کیا گیا، جہاں یورپی یونین کے علاوہ متعدد بین الاقوامی شراکت دار بھی اس منصوبے میں شامل ہوئے۔
یورپی کمیشن کے مطابق اس پروگرام میں 15 شراکت دار شریک ہیں، جن میں 12 یورپی ممالک، جاپان، عالمی بینک (World Bank) اور یورپی سرمایہ کاری بینک (European Investment Bank) شامل ہیں۔ اس اقدام کا مقصد غزہ میں بنیادی ڈھانچے کی بحالی، ضروری خدمات کی فراہمی اور متاثرہ آبادی کی مدد کے لیے مختلف منصوبوں کی حمایت کرنا ہے۔
کمیشن کا کہنا ہے کہ اس مشترکہ اقدام کے ذریعے غزہ میں فوری بحالی کے عمل کو تیز کرنے اور مستقبل کی تعمیر نو کے لیے بین الاقوامی تعاون کو مضبوط بنایا جائے گا۔
