اسکردو: پاکستان ایئرپورٹس اتھارٹی (PAA) نے اسکردو انٹرنیشنل ایئرپورٹ کی توسیع کے منصوبے پر باقاعدہ کام شروع کر دیا ہے، جس کا مقصد گلگت بلتستان میں سیاحت کو فروغ دینا اور ملکی و غیر ملکی مسافروں کو جدید اور بہتر سفری سہولیات فراہم کرنا ہے۔
پاکستان ایئرپورٹس اتھارٹی کے ترجمان کے مطابق منصوبے کے ابتدائی مرحلے میں تعمیراتی سرگرمیوں کا آغاز کر دیا گیا ہے اور اس وقت سائٹ پر لائن مارکنگ کا عمل جاری ہے۔ منصوبہ مکمل ہونے کے بعد اسکردو ایئرپورٹ خطے میں سیاحت کے فروغ اور فضائی رابطوں کو مزید مؤثر بنانے میں اہم کردار ادا کرے گا۔
ترجمان سیف اللہ خان نے بتایا کہ توسیعی منصوبے کے تحت ٹرمینل عمارت کا رقبہ 21 ہزار مربع فٹ سے بڑھا کر 39 ہزار مربع فٹ کر دیا جائے گا۔ روانگی لاؤنج میں بیٹھنے کی گنجائش 300 سے بڑھا کر 900 مسافروں تک کر دی جائے گی، جبکہ آمد لاؤنج کی استعداد 80 سے بڑھا کر 200 مسافروں تک پہنچ جائے گی۔ منصوبے میں روانگی اور آمد دونوں حصوں میں جدید ایگزیکٹو لاؤنجز بھی قائم کیے جائیں گے۔
منصوبے کے تحت چیک اِن اور بریفنگ کاؤنٹرز کی تعداد 6 سے بڑھا کر 10 کی جائے گی، جبکہ گاڑیوں کی پارکنگ کی گنجائش 200 سے بڑھا کر 600 تک بڑھائی جائے گی۔ اس کے علاوہ ایک جدید کارگو آفس بلاک بھی تعمیر کیا جائے گا تاکہ ہوائی اڈے کی آپریشنل استعداد اور کارگو خدمات کو مزید بہتر بنایا جا سکے۔
پاکستان ایئرپورٹس اتھارٹی کا کہنا ہے کہ منصوبے کی تکمیل سے نہ صرف سیاحوں اور دیگر مسافروں کو عالمی معیار کی سہولیات میسر آئیں گی بلکہ گلگت بلتستان میں سیاحت، تجارت، معاشی سرگرمیوں اور فضائی روابط کے فروغ میں بھی نمایاں مدد ملے گی۔
