تہران: ایران نے امریکی صدر ڈونلڈ ٹرمپ کے اس دعوے کی تردید کر دی ہے کہ تہران نے امریکا سے مذاکرات جاری رکھنے کی درخواست کی ہے۔
ایرانی سرکاری میڈیا کے مطابق وزارتِ خارجہ کے ترجمان اسماعیل بقائی نے واضح کیا ہے کہ ایران نے امریکا کے ساتھ مذاکرات کی کوئی درخواست نہیں کی۔ ان کا کہنا تھا کہ تہران نے صرف قطری ثالث کے ایران کے دورے کو قبول کیا ہے، جسے مذاکرات کی درخواست قرار دینا درست نہیں۔
اسماعیل بقائی نے کہا کہ ایران کی جانب سے امریکا کے ساتھ براہِ راست مذاکرات کی خواہش ظاہر نہیں کی گئی، جبکہ قطر کی ثالثی کی کوششوں کو معمول کے سفارتی رابطوں کے تناظر میں دیکھا جانا چاہیے۔
دوسری جانب امریکی صدر ڈونلڈ ٹرمپ نے اپنے بیان میں دعویٰ کیا تھا کہ ایران نے امریکا سے بات چیت جاری رکھنے کی خواہش ظاہر کی، جس پر واشنگٹن نے آمادگی ظاہر کی۔ تاہم انہوں نے یہ بھی کہا کہ دونوں ممالک کے درمیان جون میں ہونے والی جنگ بندی اب ختم ہو چکی ہے۔
ایران کی جانب سے تازہ وضاحت کے بعد دونوں ممالک کے بیانات میں واضح تضاد سامنے آیا ہے، جبکہ خطے میں جاری کشیدگی کے باعث سفارتی صورتحال پر عالمی سطح پر گہری نظر رکھی جا رہی ہے۔
