اسلام آباد: وفاقی حکومت نے پیٹرولیم مصنوعات کی قیمتوں میں نمایاں اضافہ کرتے ہوئے نئی قیمتوں کا باضابطہ نوٹیفکیشن جاری کر دیا ہے، جس کا اطلاق آج رات 12 بجے کے بعد سے ہوگا۔
پیٹرولیم ڈویژن کی جانب سے جاری نوٹیفکیشن کے مطابق پیٹرول کی قیمت میں 13 روپے 18 پیسے فی لیٹر اضافہ کیا گیا ہے، جس کے بعد نئی قیمت 310 روپے 71 پیسے فی لیٹر مقرر کر دی گئی ہے۔
اسی طرح ہائی اسپیڈ ڈیزل کی قیمت میں 13 روپے 80 پیسے فی لیٹر اضافہ کیا گیا، جس کے بعد ڈیزل 323 روپے 30 پیسے فی لیٹر میں دستیاب ہوگا۔
دوسری جانب حکومت نے مٹی کے تیل کی قیمت میں بھی اضافہ کر دیا ہے۔ آئل اینڈ گیس ریگولیٹری اتھارٹی (اوگرا) کے نوٹیفکیشن کے مطابق مٹی کا تیل 11 روپے 19 پیسے فی لیٹر مہنگا کیا گیا ہے، جس کے بعد اس کی نئی قیمت 242 روپے 33 پیسے فی لیٹر مقرر کی گئی ہے۔
نوٹیفکیشن کے مطابق پیٹرول، ڈیزل اور مٹی کے تیل کی نئی قیمتوں کا اطلاق رات 12 بجے سے ہوگا، جس کے بعد ملک بھر میں تمام پیٹرول پمپس پر صارفین سے نئی قیمتیں وصول کی جائیں گی۔
