لندن: برطانوی اداکار مائیکل وارڈ کو لندن کی ایک عدالت نے عصمت دری، جنسی زیادتی اور دیگر تمام الزامات سے بری کر دیا ہے۔
رپورٹس کے مطابق 28 سالہ اداکار پر الزام تھا کہ انہوں نے 2023 میں ایک خاتون کے ساتھ مرسڈیز گاڑی میں جنسی زیادتی کی تھی، تاہم سنیرز بروک کراؤن کورٹ (Snaresbrook Crown Court) میں جیوری نے تمام شواہد کا جائزہ لینے کے بعد انہیں بے قصور قرار دے دیا۔
عدالت نے مائیکل وارڈ کو عصمت دری کی دو دفعات، دخول کے ذریعے حملے کی دو دفعات اور جنسی زیادتی کی ایک دفعہ سمیت تمام الزامات سے بری کر دیا۔
مائیکل وارڈ نیٹ فلکس کی مقبول کرائم ڈرامہ سیریز "Top Boy” میں اپنی اداکاری کے باعث عالمی شہرت رکھتے ہیں۔ اس کے علاوہ وہ "Blue Story”، "The Book of Clarence” اور گزشتہ برس ریلیز ہونے والی امریکی سیاسی طنزیہ فلم "Eddington” میں بھی اداکاری کر چکے ہیں، جس میں ان کے ساتھ ہالی ووڈ اداکار جواکین فینکس اور پیڈرو پاسکل بھی شامل تھے۔
سال 2020 میں مائیکل وارڈ نے برٹش اکیڈمی فلم ایوارڈز (BAFTA) کا رائزنگ اسٹار ایوارڈ اپنے نام کیا تھا۔ بعد ازاں انہیں فلم "Empire of Light” اور ٹی وی سیریز "Small Axe” میں شاندار اداکاری پر بھی بافٹا ایوارڈز کے لیے نامزد کیا گیا۔مائیکل وارڈ نے مقدمے کے آغاز سے ہی تمام الزامات کی تردید کرتے ہوئے اپنی بے گناہی کا دعویٰ کیا تھا۔ فیصلے کے بعد ان کے وکیل حمزہ الیاس نے کہا کہ اداکار اس فیصلے سے مطمئن ہیں اور اب وہ دوبارہ اپنے فنی کیریئر پر مکمل توجہ دینے کے منتظر ہیں۔
