قومی اسمبلی نے ایران اور امریکا کے درمیان طے پانے والے امن معاہدے کے حوالے سے تہنیتی قرارداد متفقہ طور پر منظور کر لی، جس میں پاکستان کے سفارتی کردار اور مذاکراتی کوششوں کو سراہتے ہوئے اسے قومی اعزاز قرار دیا گیا۔
وزیر قانون اعظم نذیر تارڑ کی جانب سے پیش کی گئی قرارداد میں ایران اور امریکا کے درمیان مذاکرات کی کامیابی پر اطمینان کا اظہار کیا گیا اور اس پیش رفت کو خطے اور دنیا میں پائیدار امن و استحکام کے لیے ایک اہم سنگ میل قرار دیا گیا۔
قرارداد میں وزیراعظم محمد شہباز شریف، نائب وزیراعظم، فیلڈ مارشل سید عاصم منیر اور اس عمل میں شریک پوری پاکستانی ٹیم کو خراج تحسین پیش کیا گیا۔ ایوان نے کہا کہ پاکستان کی فعال سفارتکاری نے ملک کو عالمی سطح پر ایک قابل اعتماد، غیر جانبدار اور مصالحتی ثالث کے طور پر منوایا ہے۔
قرارداد کے متن کے مطابق وزیراعظم شہباز شریف کی قیادت میں پاکستان نے ایک امن پسند، مثبت اور تعمیری عالمی کردار ادا کیا، جسے پارلیمان نے سراہا۔ ارکان اسمبلی نے اس بات پر زور دیا کہ عالمی امن، علاقائی استحکام، مذاکرات اور سفارتی ذرائع کے فروغ کی ضرورت پہلے سے کہیں زیادہ اہم ہو چکی ہے۔
قومی اسمبلی نے ایران اور امریکا کے درمیان تاریخی امن معاہدے کو نہ صرف دونوں ممالک کے درمیان کشیدگی کے خاتمے کی جانب اہم پیش رفت قرار دیا بلکہ اس عمل میں پاکستان کے ذمہ دارانہ اور فعال کردار کو قومی وقار اور اعزاز سے تعبیر کیا۔
ایوان نے اس عزم کا اظہار بھی کیا کہ پاکستان آئندہ بھی خطے میں امن، مذاکرات اور تنازعات کے پرامن حل کے لیے اپنا مثبت کردار جاری رکھے گا۔
