اسلام آباد: نائب وزیراعظم اور وزیر خارجہ اسحاق ڈار سے اقوام متحدہ کے انڈر سیکریٹری جنرل برائے انسانی امور اور او سی ایچ اے (OCHA) کے سربراہ ٹام فلیچر نے ملاقات کی، جس میں عالمی انسانی امداد، موسمیاتی تبدیلی، غزہ کی صورتحال اور علاقائی امن و استحکام سمیت مختلف اہم امور پر تبادلہ خیال کیا گیا۔
دفتر خارجہ کے مطابق ملاقات کے دوران اسحاق ڈار نے دنیا بھر میں قدرتی آفات، انسانی بحرانوں اور مسلح تنازعات کے دوران او سی ایچ اے کی خدمات کو سراہتے ہوئے کہا کہ ادارہ متاثرہ آبادی تک بروقت امداد پہنچانے میں اہم کردار ادا کر رہا ہے۔
نائب وزیراعظم نے پاکستان میں موسمیاتی تبدیلی کے باعث آنے والی قدرتی آفات، بالخصوص سیلاب اور دیگر ہنگامی حالات کے دوران او سی ایچ اے کی معاونت کو قابلِ قدر قرار دیا اور کہا کہ پاکستان اقوام متحدہ کے اس اہم انسانی امدادی مشن کی مکمل حمایت جاری رکھے گا۔
اسحاق ڈار نے مقبوضہ فلسطینی علاقوں میں جاری انسانی بحران کا بھی ذکر کرتے ہوئے کہا کہ وہاں متاثرہ شہریوں تک امداد کی فراہمی کے لیے او سی ایچ اے کی کوششیں نہایت اہم ہیں اور عالمی برادری کو انسانی بنیادوں پر ان اقدامات کی حمایت کرنی چاہیے۔
اس موقع پر ٹام فلیچر نے خطے میں امن، استحکام اور سفارتی تعاون کے فروغ کے لیے پاکستان کی مسلسل کوششوں کو سراہا۔ انہوں نے اقوام متحدہ کے مختلف مشنز میں پاکستان کی دیرینہ خدمات اور عالمی امن و انسانی امداد کے شعبے میں اس کے مثبت کردار کی بھی تعریف کی۔
ملاقات میں دونوں رہنماؤں نے عالمی انسانی بحرانوں سے نمٹنے، بین الاقوامی تعاون کو فروغ دینے اور متاثرہ افراد تک امداد کی مؤثر فراہمی کے لیے باہمی تعاون جاری رکھنے کے عزم کا اظہار کیا۔
