پاکستان اور چین کے درمیان سفارتی تعلقات کے قیام کی 75ویں سالگرہ کے موقع پر پنجاب اسمبلی کے ینگ پارلیمنٹرینز فورم کے زیرِ اہتمام پنجاب اسمبلی میں ایک پروقار تقریب منعقد ہوئی، جس میں دونوں ممالک کے درمیان پارلیمانی روابط، نوجوان قیادت کے تعاون اور عوامی سفارت کاری کو مزید فروغ دینے کے عزم کا اعادہ کیا گیا۔
تقریب کی صدارت سپیکر پنجاب اسمبلی ملک محمد احمد خان نے کی جبکہ لاہور میں عوامی جمہوریہ چین کے قونصل جنرل سن یان مہمانِ خصوصی تھے۔ تقریب میں صدر ینگ پارلیمنٹرینز فورم آمینہ حسن شیخ، چیئرپرسن پنجاب ویمن پروٹیکشن اتھارٹی حنا پرویز بٹ، چیئرپرسن چائلڈ پروٹیکشن اینڈ ویلفیئر بیورو سارہ احمد، پنجاب اسمبلی کے نوجوان اراکین، سیکرٹری جنرل پنجاب اسمبلی چودھری عامر حبیب اور چینی قونصل خانے کے اعلیٰ حکام سمیت متعدد معزز شخصیات نے شرکت کی۔
تقریب سے خطاب کرتے ہوئے چین کے قونصل جنرل سن یان نے کہا کہ گزشتہ 75 برسوں کے دوران پاک چین تعلقات مسلسل مضبوط ہوئے ہیں اور آج دونوں ممالک ہر موسم کی آزمودہ اسٹریٹجک شراکت داری کے رشتے میں بندھے ہوئے ہیں۔
انہوں نے کہا کہ چین پاکستان اقتصادی راہداری (سی پیک) دونوں ممالک کے درمیان تعاون کا نمایاں منصوبہ ہے، جبکہ سی پیک کے دوسرے مرحلے میں زراعت، صنعت، معدنیات، جدت، ٹیکنالوجی اور دیگر اہم شعبوں میں تعاون کو مزید وسعت دی جا رہی ہے۔ ان کا کہنا تھا کہ مضبوط دوطرفہ تعلقات صرف اقتصادی منصوبوں سے نہیں بلکہ عوامی روابط، ثقافتی تبادلوں اور مؤثر طرزِ حکمرانی سے بھی مستحکم ہوتے ہیں۔
صدر ینگ پارلیمنٹرینز فورم آمنہ حسن شیخ نے کہا کہ نوجوان قیادت پاکستان اور چین کے تعلقات کو نئی بلندیوں تک لے جانے کی بھرپور صلاحیت رکھتی ہے اور دونوں ممالک کی لازوال دوستی کو آئندہ نسلوں تک منتقل کرنے میں اہم کردار ادا کرے گی۔
تقریب کے اختتام پر چینی وفد نے پنجاب اسمبلی کے تاریخی اور نئے ایوان کا دورہ کیا، جہاں انہیں اسمبلی کی پارلیمانی تاریخ، جمہوری روایات اور قانون سازی کے عمل سے متعلق بریفنگ دی گئی۔ بعد ازاں سپیکر پنجاب اسمبلی نے چینی قونصل جنرل اور وفد کے ارکان کو یادگاری شیلڈز پیش کیں، جبکہ تقریب گروپ فوٹو کے ساتھ اختتام پذیر ہوئی۔
