وزیراعظم شہباز شریف کی مسلم ورلڈ لیگ کے سیکرٹری جنرل سے ملاقات، امتِ مسلمہ کے اتحاد پر زور

اسلام آباد: وزیراعظم محمد شہباز شریف نے مسلم دنیا کو درپیش چیلنجز سے نمٹنے کے لیے مذہبی مکالمے، بین المذاہب ہم آہنگی اور امتِ مسلمہ کے اتحاد کے فروغ میں مسلم ورلڈ لیگ کے کردار کو نہایت اہم قرار دیتے ہوئے تنظیم کی عالمی سطح پر جاری کوششوں کی بھرپور حمایت کا اعادہ کیا ہے۔

وزیراعظم آفس کے مطابق مسلم ورلڈ لیگ کے سیکرٹری جنرل شیخ ڈاکٹر محمد بن عبدالکریم العیسیٰ نے وزیراعظم ہاؤس میں وزیراعظم شہباز شریف سے ملاقات کی۔ ملاقات میں نائب وزیراعظم و وزیر خارجہ سینیٹر محمد اسحاق ڈار، ارکانِ قومی اسمبلی فرح ناز اکبر اور زیب جعفر، سیکرٹری خارجہ آمنہ بلوچ جبکہ پاکستان میں سعودی عرب کے سفیر نواف سعید المالکی بھی موجود تھے۔

وزیراعظم نے ڈاکٹر العیسیٰ کا خیرمقدم کرتے ہوئے اسلام آباد میں منعقدہ او آئی سی وزارتی کانفرنس برائے خواتین میں شرکت پر ان کا شکریہ ادا کیا۔ انہوں نے اسلام کے حقیقی اور معتدل تشخص کو اجاگر کرنے، امتِ مسلمہ میں اتحاد، رواداری، اخوت اور بین المذاہب ہم آہنگی کے فروغ میں مسلم ورلڈ لیگ کی خدمات کو سراہا۔

شہباز شریف نے کہا کہ موجودہ علاقائی اور عالمی حالات میں مذہبی مکالمہ پہلے سے کہیں زیادہ اہم ہو چکا ہے۔ انہوں نے ایران اور خلیجی ممالک کے درمیان صورتحال، غزہ میں فلسطینی عوام کو درپیش مشکلات اور دنیا بھر کی مسلم برادریوں کے مسائل کے تناظر میں مسلم ورلڈ لیگ کی مثبت کاوشوں کو قابلِ قدر قرار دیا۔

وزیراعظم نے ڈاکٹر العیسیٰ کے پاکستان کے گزشتہ دوروں کا بھی ذکر کیا، جن میں اسلام آباد میں لڑکیوں کی تعلیم سے متعلق بین الاقوامی سربراہی اجلاس شامل ہے۔ انہوں نے تعلیم، انتہا پسندی کے خاتمے، اسلاموفوبیا کے تدارک اور بین المذاہب مکالمے کے شعبوں میں پاکستان اور مسلم ورلڈ لیگ کے درمیان جاری تعاون پر اطمینان کا اظہار کیا۔

وزیراعظم نے خادم الحرمین الشریفین شاہ سلمان بن عبدالعزیز آل سعود کے لیے نیک تمناؤں اور ولی عہد شہزادہ محمد بن سلمان بن عبدالعزیز آل سعود کے لیے اپنے خیرسگالی کے جذبات کا اظہار بھی کیا۔

اس موقع پر شیخ ڈاکٹر محمد بن عبدالکریم العیسیٰ نے پاکستان کی میزبانی پر وزیراعظم کا شکریہ ادا کرتے ہوئے عالم اسلام میں پاکستان کے قائدانہ کردار کو سراہا۔ انہوں نے مذہبی، تعلیمی اور انسانی ترقی کے شعبوں میں پاکستان کے ساتھ تعاون کو مزید مضبوط بنانے کے عزم کا اعادہ کیا۔

ڈاکٹر العیسیٰ نے خطے میں امن کے فروغ کے لیے وزیراعظم شہباز شریف کی کوششوں کو سراہتے ہوئے اسلام آباد مفاہمتی یادداشت کی تکمیل میں نائب وزیراعظم اسحاق ڈار اور چیف آف آرمی اسٹاف فیلڈ مارشل سید عاصم منیر کی خدمات کو بھی خراجِ تحسین پیش کیا۔

ملاقات کے اختتام پر دونوں رہنماؤں نے پاکستان اور مسلم ورلڈ لیگ کے درمیان جاری مشترکہ منصوبوں، تعلیمی و انسانی فلاح کے اقدامات اور باہمی تعاون کو مزید وسعت دینے پر اتفاق کیا۔