مسلم ورلڈ لیگ کے سیکرٹری جنرل ڈاکٹر محمد العیسیٰ کو نمل یونیورسٹی نے اعزازی پی ایچ ڈی سے نواز دیا

اسلام آباد: نیشنل یونیورسٹی آف ماڈرن لینگویجز (نمل) نے مسلم ورلڈ لیگ کے سیکرٹری جنرل ڈاکٹر محمد بن عبدالکریم العیسیٰ کو انسانیت، عالمی امن، بین المذاہب ہم آہنگی، اعتدال پسندی اور فروغِ علم کے شعبوں میں نمایاں خدمات کے اعتراف میں اعزازی ڈاکٹر آف فلاسفی (پی ایچ ڈی) کی ڈگری سے نواز دیا۔

یہ اعزاز نمل میں منعقدہ تیسرے خصوصی کانووکیشن 2026 کے دوران دیا گیا، جس میں پاکستان میں سعودی عرب کے سفیر نواف بن سعید المالکی، وزیر مملکت برائے وفاقی تعلیم و پیشہ ورانہ تربیت ڈاکٹر وجیہہ قمر، ریکٹر نمل میجر جنرل (ر) شاہد محمود کیانی، ڈائریکٹر جنرل نمل بریگیڈیئر محمد رفیق خان، پرو ریکٹر ریسرچ اینڈ اسٹریٹجک انیشی ایٹوز ڈاکٹر سفیر اعوان، فیکلٹی اراکین، طلبہ، ماہرین تعلیم اور دیگر معزز مہمان شریک ہوئے۔

اعزازی ڈگری وصول کرنے کے بعد اپنے خطاب میں ڈاکٹر محمد بن عبدالکریم العیسیٰ نے نمل کا شکریہ ادا کرتے ہوئے کہا کہ یہ اعزاز ان کے لیے باعثِ فخر ہونے کے ساتھ ایک بڑی ذمہ داری بھی ہے۔ انہوں نے پاکستان کے دورے پر خوشی کا اظہار کرتے ہوئے پاکستانی عوام اور نمل انتظامیہ کی جانب سے ملنے والی محبت، احترام اور مہمان نوازی کو سراہا۔

انہوں نے کہا کہ علاقائی اور عالمی امن کے فروغ میں پاکستان کا کردار قابلِ تحسین ہے، جو نہ صرف پاکستان بلکہ پوری امتِ مسلمہ کے لیے باعثِ افتخار ہے۔ انہوں نے ملک میں امن، استحکام اور قومی اتحاد کے لیے کی جانے والی کوششوں کو سراہتے ہوئے پاکستان کی ترقی، امن اور خوشحالی کے لیے نیک تمناؤں کا اظہار کیا۔

اس موقع پر ریکٹر نمل میجر جنرل (ر) شاہد محمود کیانی نے کہا کہ جامعات صرف تعلیم دینے کے مراکز نہیں بلکہ ایسے ادارے ہیں جہاں معاشروں کا فکری اور اخلاقی شعور تشکیل پاتا ہے۔ ان کے مطابق علمی تعاون، تحقیقی روابط، زبانوں کی تعلیم اور بین الثقافتی ہم آہنگی مختلف اقوام کو قریب لانے میں اہم کردار ادا کرتے ہیں۔

انہوں نے کہا کہ ڈاکٹر محمد بن عبدالکریم العیسیٰ کی نمل آمد پاکستان اور سعودی عرب کے مضبوط برادرانہ تعلقات، علم، اعتدال، مکالمے اور عالمی تعاون کے مشترکہ عزم کی عکاس ہے۔

وزیر مملکت برائے وفاقی تعلیم و پیشہ ورانہ تربیت ڈاکٹر وجیہہ قمر نے بھی ڈاکٹر العیسیٰ کو اعزازی پی ایچ ڈی دیے جانے پر نمل کو مبارکباد دیتے ہوئے کہا کہ بین المذاہب ہم آہنگی، مسلم ممالک کے اتحاد اور عالمی امن و رواداری کے فروغ کے لیے ان کی خدمات قابلِ قدر ہیں۔

انہوں نے کہا کہ نمل زبانوں، ثقافتوں اور بین الثقافتی روابط کے فروغ میں اہم کردار ادا کر رہی ہے اور تعلیم کے ذریعے مختلف اقوام کے درمیان تعلقات کو مزید مستحکم بنانے میں نمایاں خدمات انجام دے رہی ہے۔ انہوں نے پاکستان اور سعودی عرب کے دیرینہ برادرانہ تعلقات کو دونوں ممالک کے درمیان مضبوط تعاون کی علامت قرار دیا۔

تقریب کے اختتام پر ڈاکٹر محمد بن عبدالکریم العیسیٰ نے نمل کی وزیٹرز بک میں اپنے تاثرات قلم بند کیے، جبکہ بعد ازاں شرکاء کے ساتھ یادگاری گروپ فوٹو بھی بنوائی گئی۔