تہران: ایران کے سپریم لیڈر مجتبیٰ خامنہ ای نے اپنے والد مرحوم سید آیت اللّٰہ خامنہ ای کے قتل کا بدلہ لینے کے عزم کا اظہار کرتے ہوئے کہا ہے کہ ذمہ دار عناصر کو کسی صورت معاف نہیں کیا جائے گا۔
مجتبیٰ خامنہ ای نے اپنے والد کی تدفین اور آخری رسومات کے اختتام پر جاری ایک تحریری پیغام میں کہا کہ سپریم لیڈر کے قتل کا بدلہ لینا قوم کا مطالبہ ہے اور ایران اس مطالبے کو پورا کرے گا۔
انہوں نے کہا کہ "ہم ان مجرموں سے شہید رہنما سمیت تمام شہداء کا بدلہ لینے کا عہد کرتے ہیں اور ذمہ داروں کو کسی صورت معاف نہیں کیا جائے گا۔”
اپنے بیان میں مجتبیٰ خامنہ ای نے ایران اور عراق میں لاکھوں افراد کی جانب سے آیت اللّٰہ خامنہ ای کی نمازِ جنازہ اور آخری رسومات میں شرکت پر اظہارِ تشکر بھی کیا۔ ان کے مطابق تہران، قم، مشہد، نجف اور کربلا سمیت مختلف شہروں اور دیہات میں عوام کی بڑی تعداد کی شرکت قومی اتحاد، استقامت اور انقلابِ اسلامی سے وابستگی کا اظہار ہے۔
انہوں نے مزید کہا کہ وہ اپنے والد کے مشن اور راستے کو پوری ثابت قدمی سے جاری رکھیں گے اور ایران مشکلات کے باوجود اپنے اہداف سے پیچھے نہیں ہٹے گا۔
مجتبیٰ خامنہ ای نے یہ بھی دعویٰ کیا کہ قاتلوں کی شناخت ہو چکی ہے اور انہیں یہ امید نہیں رکھنی چاہیے کہ وہ انصاف سے بچ سکیں گے۔ ان کے بقول انتقام کا عمل کسی ایک فرد یا منصب سے وابستہ نہیں بلکہ ہر صورت جاری رہے گا۔
