راولپنڈی کی اڈیالہ جیل میں منگل کے روز بانی پاکستان تحریک انصاف (پی ٹی آئی) اور ان کی اہلیہ بشریٰ بی بی کے درمیان ہفتہ وار ملاقات کرائی گئی، جو تقریباً 40 منٹ تک جاری رہی۔ جیل ذرائع کے مطابق ملاقات کانفرنس روم میں ہوئی جہاں دونوں نے ایک دوسرے کی خیریت دریافت کی اور مختلف امور پر تبادلہ خیال کیا۔
ذرائع کے مطابق ملاقات جیل انتظامیہ کی نگرانی میں مقررہ قواعد و ضوابط کے تحت کروائی گئی۔ بانی پی ٹی آئی اور بشریٰ بی بی کے درمیان ہونے والی ملاقات کے دوران کسی تیسرے شخص کو موجود رہنے کی اجازت نہیں دی گئی۔
دوسری جانب ملاقات کے مقررہ دن کے باوجود بانی پی ٹی آئی سے کسی وکیل یا اہل خانہ کی ملاقات نہ ہو سکی۔ ذرائع کا کہنا ہے کہ جیل انتظامیہ کی جانب سے سیکیورٹی اور انتظامی وجوہات کی بنا پر دیگر ملاقاتوں کی اجازت نہیں دی گئی۔
ادھر وزیراعلیٰ خیبر پختونخوا سہیل آفریدی بھی بانی پی ٹی آئی سے اظہارِ یکجہتی کے لیے اڈیالہ جیل پہنچے، تاہم ان کی ملاقات کے حوالے سے کوئی باضابطہ اطلاع سامنے نہیں آئی۔
بانی پی ٹی آئی کی بہنیں علیمہ خان، نورین نیازی اور عظمیٰ خان بھی اپنے بھائی سے ملاقات کی غرض سے اڈیالہ جیل کے قریب پہنچیں، لیکن پولیس نے انہیں فیکٹری ناکہ سے آگے جانے کی اجازت نہیں دی۔ ذرائع کے مطابق سیکیورٹی انتظامات کے باعث انہیں جیل تک رسائی نہیں دی گئی۔
یاد رہے کہ بانی پی ٹی آئی اور بشریٰ بی بی مختلف مقدمات کے سلسلے میں اڈیالہ جیل میں قید ہیں، جبکہ ان کی ہفتہ وار ملاقاتیں عدالتی اور جیل قوانین کے تحت کرائی جاتی ہیں۔
