اسلام آباد: وزارت مذہبی امور و بین المذاہب ہم آہنگی نے حج 2027 کے لیے رجسٹریشن کرانے والے تمام خواہشمند افراد کو ہدایت کی ہے کہ وہ جلد از جلد ایسا پاسپورٹ بنوا لیں جو 16 نومبر 2027 تک مؤثر (کارآمد) ہو، تاکہ آئندہ مراحل میں کسی قسم کی دشواری کا سامنا نہ کرنا پڑے۔
ترجمان وزارت مذہبی امور عمر بٹ نے پیر کو جاری اپنے بیان میں کہا کہ حج 2027 کے لیے آن لائن رجسٹریشن کا عمل جاری ہے، جس کے بعد درخواستوں کے اگلے مرحلے کا آغاز کیا جائے گا۔
انہوں نے بتایا کہ تمام رجسٹرڈ درخواست گزاروں کے لیے ضروری ہے کہ وہ جلد از جلد اپنا کارآمد پاسپورٹ حاصل کریں، کیونکہ آئندہ مرحلے میں آن لائن پاسپورٹ اپ لوڈ کرنا لازمی ہوگا۔
ترجمان نے واضح کیا کہ جن افراد کے پاس پاسپورٹ موجود نہیں یا اس کی مدتِ معیاد مقررہ تاریخ سے پہلے ختم ہو رہی ہے، وہ فوری طور پر نیا پاسپورٹ بنوائیں یا اس کی تجدید کروا لیں تاکہ حج درخواست کے آئندہ مراحل بروقت مکمل کیے جا سکیں۔
وزارت مذہبی امور نے تمام رجسٹرڈ عازمین سے اپیل کی ہے کہ وہ مقررہ ہدایات پر عمل کریں اور مطلوبہ سفری دستاویزات بروقت مکمل رکھیں تاکہ حج 2027 کے انتظامی مراحل میں کسی رکاوٹ کا سامنا نہ ہو۔
