لاہور: پاکستان علماء کونسل کے چیئرمین حافظ محمد طاہر محمود اشرفی نے کہا ہے کہ اگر پاکستان کا نظام آئین و قانون کے مطابق چلایا جائے تو ملک کبھی نہیں ٹوٹے گا، جبکہ قومی استحکام کے لیے آئین کی بالادستی اور بروقت انصاف ناگزیر ہیں۔
اپنے بیان میں حافظ محمد طاہر محمود اشرفی نے کہا کہ یہ افسوسناک امر ہے کہ آج عوام کی سب سے زیادہ مایوسی عدالتی نظام سے وابستہ ہے، جہاں عام نوعیت کے مقدمات بھی کئی کئی برس تک زیر التوا رہتے ہیں، جس سے انصاف کی فراہمی متاثر ہوتی ہے۔
انہوں نے کہا کہ اگر ملک کے نظام میں حقیقی اصلاحات لانی ہیں تو اس کا آغاز عدلیہ سے ہونا چاہیے۔ ان کے مطابق عدالتی نظام کو مؤثر، شفاف اور تیز رفتار بنانا وقت کی اہم ضرورت ہے تاکہ عوام کو بروقت اور منصفانہ انصاف فراہم کیا جا سکے۔
چیئرمین پاکستان علماء کونسل نے زور دیا کہ آئین و قانون کی بالادستی کو ہر صورت یقینی بنایا جائے، کیونکہ مضبوط ادارے، شفاف عدالتی نظام اور قانون کی حکمرانی ہی پاکستان کے استحکام اور ترقی کی بنیاد ہیں۔
انہوں نے کہا کہ عوام کا ریاستی اداروں پر اعتماد بحال کرنے کے لیے عدالتی اصلاحات ناگزیر ہیں، جبکہ انصاف کی بروقت فراہمی سے معاشرے میں قانون کی عملداری مزید مضبوط ہوگی۔
