پاکستان اور روس کا تجارت، توانائی اور علاقائی تعاون مزید مضبوط بنانے کے عزم کا اعادہ

منیلا: نائب وزیراعظم و وزیر خارجہ اسحاق ڈار نے فلپائن کے دارالحکومت منیلا میں روسی وزیر خارجہ سرگئی لاروف سے ملاقات کی، جس میں پاکستان اور روس کے درمیان دوطرفہ تعلقات، علاقائی صورتحال اور مختلف شعبوں میں تعاون کے فروغ پر تفصیلی تبادلہ خیال کیا گیا۔

ترجمان دفتر خارجہ کے مطابق ملاقات کے دوران دونوں رہنماؤں نے تجارت، توانائی، رابطہ کاری (Connectivity) اور باہمی دلچسپی کے دیگر شعبوں میں تعاون کو مزید وسعت دینے کے عزم کا اعادہ کیا۔

ملاقات میں موجودہ علاقائی اور عالمی سیاسی و سلامتی کی صورتحال پر بھی تبادلہ خیال کیا گیا، جبکہ دونوں فریقین نے مشترکہ چیلنجز سے نمٹنے کے لیے مشاورت اور سفارتی رابطوں کو جاری رکھنے کی ضرورت پر زور دیا۔

ترجمان کے مطابق اسحاق ڈار اور سرگئی لاروف نے پاکستان اور روس کے درمیان بڑھتی ہوئی شراکت داری کو مزید مستحکم بنانے کے لیے اعلیٰ سطح کے روابط برقرار رکھنے اور باقاعدہ مشاورت جاری رکھنے پر بھی اتفاق کیا۔

یہ ملاقات آسیان ریجنل فورم کے وزارتی اجلاس کے موقع پر ہوئی، جہاں مختلف ممالک کے وزرائے خارجہ علاقائی و عالمی امور پر مشاورت کر رہے ہیں۔