اسلام آباد: مصر کے قومی دن کے موقع پر اسلام آباد کے ایک مقامی ہوٹل میں منعقدہ پروقار تقریب میں پاکستان اور مصر نے دوطرفہ تعلقات، اقتصادی تعاون اور اسٹریٹجک شراکت داری کو مزید مضبوط بنانے کے عزم کا اعادہ کیا۔
تقریب میں پاکستان میں مصر کے سفیر نے مہمانوں کا خیرمقدم کرتے ہوئے کہا کہ مصر اور پاکستان کے درمیان تعلقات باہمی احترام، مشترکہ اقدار اور تاریخی دوستی پر مبنی ہیں، جو وقت کے ساتھ مزید مستحکم ہو رہے ہیں۔
اس موقع پر وفاقی وزیر تجارت جام کمال خان نے بطور مہمان خصوصی خطاب کرتے ہوئے کہا کہ پاکستان مصر کے ساتھ اپنے برادرانہ تعلقات کو انتہائی اہمیت دیتا ہے اور دونوں ممالک کے درمیان تعاون کا دائرہ مسلسل وسیع ہو رہا ہے۔
مصری سفیر نے کہا کہ 1952 کا مصری انقلاب ملک کی جدید تاریخ کا ایک اہم سنگ میل تھا، جس نے آزادی، سماجی انصاف، قومی وقار اور ترقی کی نئی بنیاد رکھی۔ انہوں نے کہا کہ مصر آج بھی امن، استحکام، اقتصادی ترقی اور بین الاقوامی تعاون کے اصولوں پر کاربند ہے۔
انہوں نے پاکستان اور مصر کے درمیان گزشتہ دو برسوں میں ہونے والے اعلیٰ سطحی روابط کا ذکر کرتے ہوئے کہا کہ مصر کے وزیر خارجہ ڈاکٹر بدر عبدالعاطی کے پاکستان کے دو دوروں اور پاکستان کے نائب وزیر اعظم و وزیر خارجہ محمد اسحاق ڈار کے دورۂ مصر نے دوطرفہ تعلقات کو نئی جہت دی ہے۔
سفیر کے مطابق ان اعلیٰ سطحی تبادلوں کے نتیجے میں سیاسی مشاورت، اقتصادی تعاون، تجارت، سرمایہ کاری اور دیگر اہم شعبوں میں شراکت داری مزید مضبوط ہوئی ہے اور دونوں ممالک مستقبل میں بھی اس تعاون کو وسعت دینے کے لیے پرعزم ہیں۔
انہوں نے اس بات پر زور دیا کہ موجودہ علاقائی اور عالمی چیلنجز کے دوران پاکستان اور مصر سفارت کاری، مذاکرات، امن اور بین الاقوامی قانون کی پاسداری پر یکساں یقین رکھتے ہیں۔
مصری سفیر نے کہا کہ دونوں ممالک کے درمیان تجارت، سرمایہ کاری، عوامی روابط اور ثقافتی تبادلوں کو فروغ دے کر تعلقات کو مزید مستحکم بنایا جا سکتا ہے۔
اپنے خطاب کے اختتام پر انہوں نے پاکستانی عوام کی مہمان نوازی کو سراہتے ہوئے کہا کہ پاکستان میں اپنی تعیناتی کے دوران انہیں ہمیشہ محبت، احترام اور خلوص کا احساس ہوا، جو دونوں ممالک کی دیرینہ دوستی کا حقیقی مظہر ہے۔
تقریب میں وفاقی وزراء، اعلیٰ حکومتی شخصیات، سفارتی کور کے ارکان، کاروباری رہنماؤں اور پاکستان میں مقیم مصری کمیونٹی کے نمائندوں نے بھی شرکت کی۔
