اسلام آباد: چین کی نیشنل امیگریشن ایڈمنسٹریشن کے ڈائریکٹر جنرل چی جِنگ یانگ کی قیادت میں اعلیٰ سطح کے وفد نے وفاقی وزیر داخلہ محسن نقوی اور وزیر مملکت برائے داخلہ طلال چودھری سے ملاقات کی، جس میں دونوں ممالک نے امیگریشن، بارڈر مینجمنٹ، سرحدی سکیورٹی اور ادارہ جاتی تعاون کو مزید مضبوط بنانے پر اتفاق کیا۔
ملاقات کے دوران غیر قانونی امیگریشن، اسلحہ اسمگلنگ، انسانی اسمگلنگ اور سرحد پار جرائم کے خلاف مشترکہ کارروائیوں کو مزید مؤثر بنانے پر تبادلہ خیال کیا گیا۔ دونوں فریقوں نے امیگریشن کے عمل کو تیز اور مؤثر بنانے کے لیے باہمی معاہدے کو جلد از جلد حتمی شکل دینے پر بھی اتفاق کیا۔
اجلاس میں فیصلہ کیا گیا کہ بارڈر مینجمنٹ اور سرحدی سکیورٹی کو بہتر بنانے کے لیے پاک چین مشترکہ ورکنگ گروپ قائم کیا جائے گا، جو دونوں ممالک کے درمیان تعاون کو مزید منظم اور مؤثر بنائے گا۔
وفاقی وزیر داخلہ محسن نقوی نے کہا کہ پاکستان لینڈ بارڈرز، سی پورٹس اور امیگریشن مینجمنٹ کے شعبوں میں چین کے ساتھ تعاون کو مزید فروغ دے گا۔ انہوں نے کہا کہ حکومت غیر قانونی امیگریشن، غیر قانونی بارڈر کراسنگ اور اسمگلنگ کے خلاف زیرو ٹالرنس پالیسی پر عمل پیرا ہے اور ایسے جرائم میں ملوث عناصر کے خلاف بلاامتیاز کارروائیاں جاری ہیں۔
انہوں نے مزید بتایا کہ خنجراب پاس پر سکیورٹی مزید مضبوط بنانے کے لیے گلگت بلتستان اسکاؤٹس کی نئی چیک پوسٹ قائم کی جا رہی ہے۔
وزیر مملکت برائے داخلہ طلال چودھری نے کہا کہ پاکستان اور چین کے درمیان قریبی تعاون کے ذریعے غیر قانونی امیگریشن اور سرحدی جرائم کی روک تھام کو مزید مؤثر بنایا جائے گا۔
چینی وفد نے غیر قانونی بارڈر کراسنگ اور اسمگلنگ کی روک تھام کے لیے پاکستان کے اقدامات کو سراہتے ہوئے کہا کہ چین پاکستان کے ساتھ اپنی اسٹریٹجک شراکت داری کو مزید مضبوط بنانے کا خواہاں ہے۔ ڈائریکٹر جنرل چی جِنگ یانگ نے یقین دلایا کہ چین پاکستانی اداروں کی استعداد کار بڑھانے میں اپنا تعاون جاری رکھے گا۔
اس موقع پر چینی وفد نے وزیر داخلہ محسن نقوی کو چین کے وزیر داخلہ کی جانب سے پبلک سکیورٹی فورم میں شرکت کا دعوت نامہ بھی پیش کیا، جبکہ فیڈرل انویسٹی گیشن ایجنسی (FIA) کے وفد کو بھی فورم میں شرکت کی دعوت دی گئی۔
چین کے سفیر نے بتایا کہ پاکستانی پولیس افسران اسی ماہ تربیتی پروگرام کے لیے چین روانہ ہوں گے، جبکہ چینی ماہرین پاکستان میں اسپیشل پروٹیکشن یونٹ (SPU) کے اہلکاروں کو چینی زبان کی خصوصی تربیت بھی فراہم کر رہے ہیں۔
ملاقات میں چینی سفیر، سیکرٹری داخلہ، ڈی جی ایف آئی اے، ڈی جی این سی سی آئی اے، چیف کمشنر اسلام آباد اور آئی جی اسلام آباد سمیت اعلیٰ حکام بھی شریک تھے۔
