شنگھائی: نائب وزیرِ اعظم اور وزیرِ خارجہ محمد اسحاق ڈار نے شنگھائی میں چین کے وزیر خارجہ وانگ یی سے ملاقات کی، جس میں دونوں ممالک نے سی پیک 2.0 کے تحت تعاون کو مزید وسعت دینے، تجارت، سرمایہ کاری، ڈیجیٹل معیشت اور مصنوعی ذہانت کے شعبوں میں شراکت داری مضبوط بنانے پر اتفاق کیا۔
دفتر خارجہ کے مطابق ملاقات میں پاکستان اور چین کے درمیان ہر موسم کی آزمودہ اسٹریٹجک تعاون پر مبنی شراکت داری کا جائزہ لیا گیا اور دوطرفہ تعلقات کو مزید مستحکم بنانے کے عزم کا اعادہ کیا گیا۔
دونوں رہنماؤں نے چین پاکستان اقتصادی راہداری (CPEC 2.0) کے تحت اعلیٰ معیار کی ترقی کو آگے بڑھانے کی اہمیت پر زور دیا اور تجارت، سرمایہ کاری، سائنس و ٹیکنالوجی، ڈیجیٹل معیشت اور مصنوعی ذہانت کے شعبوں میں تعاون بڑھانے پر اتفاق کیا۔
ملاقات کے دوران خطے اور عالمی صورتحال پر بھی تفصیلی تبادلہ خیال کیا گیا، جبکہ باہمی دلچسپی کے امور پر قریبی رابطے اور مشاورت جاری رکھنے کے عزم کا اظہار کیا گیا۔
دوسری جانب پاکستان نے ورلڈ آرٹیفیشل انٹیلیجنس کوآپریشن آرگنائزیشن (WAICO) کے قیام کے معاہدے پر بھی شنگھائی میں دستخط کر دیے ہیں۔ نائب وزیرِ اعظم اسحاق ڈار نے پاکستان کی جانب سے معاہدے پر دستخط کرتے ہوئے مصنوعی ذہانت کے شعبے میں بین الاقوامی تعاون، خصوصاً گلوبل ساؤتھ کے تناظر میں، مشترکہ ترقی اور مساوی رسائی کے فروغ کے عزم کا اعادہ کیا۔
پاکستان کا مؤقف ہے کہ مصنوعی ذہانت تک منصفانہ رسائی ترقی، اختراع اور مشترکہ خوشحالی کے فروغ میں کلیدی کردار ادا کر سکتی ہے، اور اس مقصد کے لیے پاکستان دیگر رکن ممالک کے ساتھ قریبی تعاون جاری رکھے گا۔
