ٹوکیو: جاپان میں پاکستانی کمیونٹی کی فلاح و بہبود، پاکستان کے مثبت تشخص کے فروغ اور دونوں ممالک کے درمیان تجارتی و معاشی تعلقات کو مزید مستحکم بنانے کے حوالے سے پاک جاپان بزنس کونسل کے صدر رانا عابد حسین نے سفارت خانہ پاکستان میں سفیر پاکستان عبدالحمید سے اہم ملاقات کی۔
ملاقات کے دوران پاکستان اور جاپان کے درمیان تجارت، سرمایہ کاری، باہمی تعاون اور جاپان میں مقیم پاکستانی کمیونٹی کو درپیش امور پر تفصیلی تبادلہ خیال کیا گیا۔ دونوں شخصیات نے اس عزم کا اظہار کیا کہ پاکستان کے قومی مفاد کو مقدم رکھتے ہوئے مشترکہ کاوشوں کے ذریعے کمیونٹی کی خدمت اور دوطرفہ تعلقات کے فروغ کے لیے مل کر کام کیا جائے گا۔
اس موقع پر پاکستان مسلم لیگ (ن) جاپان کے صدر ملک نور اعوان کی پاکستانی کمیونٹی کے لیے خدمات اور مثبت کردار کو بھی سراہا گیا۔
سفیر پاکستان عبدالحمید نے کہا کہ جاپان میں قائم سفارت خانہ پاکستان، بیرون ملک مقیم تمام پاکستانیوں کا مشترکہ ادارہ ہے، جس کا بنیادی مقصد کمیونٹی کی خدمت، پاکستان کی نیک نامی کو اجاگر کرنا اور پاکستان و جاپان کے درمیان تعلقات کو مزید مضبوط بنانا ہے۔
پاک جاپان بزنس کونسل کے صدر رانا عابد حسین نے اس موقع پر یقین دہانی کرائی کہ کونسل آئندہ بھی سفارت خانے کے ساتھ مکمل تعاون جاری رکھتے ہوئے پاکستان کے مثبت تشخص کو اجاگر کرنے، تجارتی سرگرمیوں کے فروغ اور سرمایہ کاری کے نئے مواقع پیدا کرنے میں فعال کردار ادا کرتی رہے گی۔ ملاقات میں سفارت خانہ پاکستان کے کونسلر حسنین حیدر بھی شریک تھے۔
