آزاد جموں و کشمیر کے سابق وزیراعظم سردار تنویر الیاس کے قافلے پر پونچھ ڈویژن میں نامعلوم مسلح افراد کی فائرنگ کے نتیجے میں ایک سیکیورٹی گارڈ جاں بحق جبکہ متعدد افراد زخمی ہو گئے۔
ذرائع کے مطابق حملہ اس وقت کیا گیا جب سردار تنویر الیاس کا قافلہ پونچھ ڈویژن سے گزر رہا تھا۔ حملے کے دوران سابق وزیراعظم اپنی بلٹ پروف گاڑی میں موجود تھے اور محفوظ رہے، تاہم ان کے سیکیورٹی گارڈ نے جان کی بازی ہار دی جبکہ کئی افراد زخمی ہوئے۔
واقعے کے فوری بعد زخمیوں کو قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے۔
حملے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا، تاہم حملہ آور فائرنگ کے بعد موقع سے فرار ہونے میں کامیاب ہوگئے۔
ذرائع کے مطابق واقعے کے بعد آزاد کشمیر بھر میں سیکیورٹی ہائی الرٹ کر دی گئی ہے، جبکہ مختلف داخلی اور خارجی راستوں پر ناکہ بندیاں قائم کر کے مشتبہ افراد کی تلاش جاری ہے۔
سیاسی اور سماجی حلقوں نے اس حملے کی شدید مذمت کرتے ہوئے ذمہ دار عناصر کی فوری گرفتاری اور واقعے کی شفاف تحقیقات کا مطالبہ کیا ہے۔
تاحال حکام کی جانب سے حملے کی وجوہات یا حملہ آوروں کی شناخت کے حوالے سے کوئی باضابطہ بیان جاری نہیں کیا گیا، جبکہ قانون نافذ کرنے والے ادارے واقعے کی مختلف پہلوؤں سے تحقیقات کر رہے ہیں۔
