مظفرآباد: وزیراعظم آزاد جموں و کشمیر فیصل ممتاز راٹھور نے کہا ہے کہ مہاجرین کی مخصوص نشستوں کے خاتمے کا معاملہ کسی شکوے یا گلے کا اظہار نہیں بلکہ ایک جائز اور آئینی مطالبہ ہے، جس پر سنجیدہ اور بامعنی بحث کی ضرورت ہے۔
اپنے بیان میں وزیراعظم آزاد کشمیر نے کہا کہ مہاجرین نشستوں کے مستقبل سے متعلق کسی بھی فیصلے کے لیے سب سے موزوں اور بااختیار فورم آزاد کشمیر کی قانون ساز اسمبلی ہے، جہاں آئینی اور جمہوری انداز میں اس معاملے پر غور کیا جانا چاہیے۔
انہوں نے کہا کہ وقت کے ساتھ تمام فریق اس حقیقت کو تسلیم کریں گے کہ اس حساس معاملے کا پائیدار حل صرف جمہوری اور آئینی طریقہ کار کے ذریعے ہی ممکن ہے، نہ کہ کسی دوسرے راستے سے۔
فیصل ممتاز راٹھور کا کہنا تھا کہ سیاسی حقوق کے حصول کے لیے سیاسی جدوجہد ہی مؤثر اور مہذب راستہ ہے، جبکہ احتجاج، ہنگامہ آرائی یا تصادم مسائل کا حل نہیں۔
انہوں نے تمام سیاسی جماعتوں، متعلقہ حلقوں اور اسٹیک ہولڈرز پر زور دیا کہ وہ مہاجرین نشستوں کے معاملے پر پارلیمانی روایات کو مدنظر رکھتے ہوئے قانون ساز اسمبلی میں کھلے اور تعمیری مکالمے کو فروغ دیں تاکہ ایک ایسا حل سامنے آئے جو آئین، جمہوری اقدار اور عوامی مفاد سے ہم آہنگ ہو۔
واضح رہے کہ مہاجرین کی مخصوص نشستوں کے حوالے سے حالیہ دنوں میں سیاسی سطح پر بحث میں تیزی آئی ہے، جبکہ مختلف سیاسی رہنما اس معاملے پر اپنے اپنے مؤقف کا اظہار کر رہے ہیں۔
