ٹرمپ نے ایران پر شدید امریکی حملے کی تصدیق کر دی، فوجیوں کی ہلاکت کا جواب قرار دے دیا
واشنگٹن: امریکی صدر ڈونلڈ ٹرمپ نے ایران پر تازہ امریکی حملوں کی تصدیق کرتے ہوئے کہا ہے کہ گزشتہ رات ایران پر بھرپور فوجی کارروائی کی گئی، جو امریکی فوجیوں کی ہلاکت کے ردعمل میں انجام دی گئی۔
اپنے بیان میں صدر ٹرمپ نے کہا کہ "ہم نے گزشتہ رات ایران پر شدید حملہ کیا۔ یہ کارروائی امریکیوں کو قتل کرنے کے جواب میں کی گئی ہے۔”
انہوں نے امریکی فوجیوں کی ہلاکت پر افسوس کا اظہار کرتے ہوئے کہا کہ "ہمیں اپنے فوجیوں کی شہادت پر گہرا دکھ ہے۔ وہ اس مقصد کے لیے لڑ رہے تھے کہ ایران کبھی بھی ایٹمی ہتھیار حاصل نہ کر سکے۔”
ٹرمپ نے اس بات کا اعادہ کیا کہ امریکا ایران کو جوہری ہتھیار حاصل کرنے کی اجازت نہیں دے گا اور امریکی مفادات کے خلاف کسی بھی کارروائی کا بھرپور جواب دیا جائے گا۔
یہ بیان ایسے وقت میں سامنے آیا ہے جب امریکی فوج نے ایران پر مسلسل نویں رات بھی حملے کیے ہیں۔ اطلاعات کے مطابق حملوں میں ایران کے تبریز، چابہار، سیرک، ہرمزگان، بوشہر اور کونارک کے علاقوں کو نشانہ بنایا گیا۔
ایرانی حکام کی جانب سے ان حملوں پر مختلف ردعمل سامنے آئے ہیں، تاہم متاثرہ علاقوں میں نقصانات کی مکمل تفصیلات فوری طور پر جاری نہیں کی گئیں۔
امریکا اور ایران کے درمیان حالیہ فوجی کشیدگی کے باعث پورے مشرق وسطیٰ میں سکیورٹی خدشات میں اضافہ ہوا ہے، جبکہ عالمی برادری صورتحال پر گہری نظر رکھے ہوئے ہے۔
