اسلام آباد میں وزارت خارجہ کے زیر اہتمام مینگو فیسٹیول کا انعقاد کیا گیا، جس کا مقصد پاکستان کے اعلیٰ معیار کے آموں، ان کی مختلف اقسام اور عالمی منڈیوں میں ان کی بڑھتی ہوئی اہمیت کو اجاگر کرنا تھا۔
تقریب میں سیکرٹری خارجہ آمنہ بلوچ نے بطور مہمان خصوصی شرکت کی، جبکہ وزارت خارجہ کے سینئر حکام، مختلف ممالک کے سفیروں، سفارتی نمائندوں اور دیگر معزز مہمانوں نے بھی شرکت کی۔
فیسٹیول کے دوران شرکا کو پاکستان میں پیدا ہونے والے مختلف اقسام کے آموں سے متعارف کرایا گیا۔ انہیں آموں کے منفرد ذائقے، معیار اور بین الاقوامی سطح پر پاکستانی آموں کی بڑھتی ہوئی مقبولیت کے بارے میں بھی آگاہ کیا گیا۔
تقریب کا مقصد اقتصادی سفارت کاری کو فروغ دیتے ہوئے پاکستان کے زرعی شعبے، خصوصاً آم کی پیداوار اور برآمدات کو عالمی سطح پر نمایاں کرنا تھا تاکہ بین الاقوامی منڈیوں میں پاکستانی آموں کی طلب میں مزید اضافہ ہو سکے۔
غیر ملکی سفارت کاروں نے پاکستانی آموں کے ذائقے اور معیار کو بے حد سراہتے ہوئے انہیں پاکستان کی زرعی اور ثقافتی شناخت کا اہم حصہ قرار دیا۔ شرکا کا کہنا تھا کہ پاکستانی آم دنیا کے بہترین آموں میں شمار ہوتے ہیں اور عالمی منڈی میں اپنی منفرد پہچان رکھتے ہیں۔
وزارت خارجہ کے مطابق مینگو فیسٹیول جیسے اقدامات اقتصادی سفارت کاری کے فروغ، زرعی برآمدات میں اضافے اور پاکستان کی اعلیٰ معیار کی زرعی مصنوعات کو دنیا بھر میں متعارف کرانے کی حکومتی کوششوں کا حصہ ہیں۔
