اسلام آباد: نائب وزیراعظم و وزیر خارجہ سینیٹر محمد اسحاق ڈار سے اقوام متحدہ کے سیکریٹری جنرل کے عہدے کی امیدوار کیرولین روڈریگز برکٹ نے ملاقات کی، جس میں عالمی امور، اقوام متحدہ کے کردار اور بین الاقوامی قانون سے متعلق اہم امور پر تبادلہ خیال کیا گیا۔
وزارت خارجہ کی جانب سے جاری بیان کے مطابق اسحاق ڈار نے ملاقات کے دوران کثیرالجہتی تعاون، اقوام متحدہ کے منشور کے مقاصد و اصولوں اور عالمی امن و سلامتی کے فروغ کے لیے پاکستان کے غیر متزلزل عزم کا اعادہ کیا۔
انہوں نے کہا کہ پاکستان بین الاقوامی معاملات میں اقوام متحدہ کے مرکزی کردار کی مضبوط حمایت جاری رکھے گا اور عالمی تنازعات کے پائیدار حل کے لیے اقوام متحدہ کے مؤثر کردار کو ناگزیر سمجھتا ہے۔
نائب وزیراعظم نے بین الاقوامی قانون اور عالمی معاہدات کے احترام کی ضرورت پر زور دیتے ہوئے کہا کہ اقوام متحدہ کی سلامتی کونسل کی قراردادوں پر دیانتداری سے عمل درآمد انتہائی اہم ہے، خصوصاً جموں و کشمیر اور فلسطین جیسے دیرینہ تنازعات کے حل کے لیے عالمی برادری کو اپنی ذمہ داریاں پوری کرنا ہوں گی۔
اسحاق ڈار نے اس موقع پر کہا کہ بدلتے ہوئے عالمی حالات اور نئے چیلنجز سے مؤثر انداز میں نمٹنے کے لیے اقوام متحدہ میں ضروری اصلاحات ناگزیر ہیں تاکہ یہ ادارہ موجودہ تقاضوں سے ہم آہنگ ہو سکے اور ترقی پذیر ممالک کی ضروریات اور توقعات کو زیادہ مؤثر انداز میں پورا کر سکے۔
ملاقات میں عالمی تعاون، مؤثر کثیرالجہتی نظام اور بین الاقوامی امن و استحکام کے فروغ سے متعلق مختلف امور پر بھی تبادلہ خیال کیا گیا۔
