اسلام آباد میں نیشنل میڈیا ورکشاپ کے 85 رکنی وفد نے وزارتِ خارجہ کا دورہ کیا، جہاں ترجمان دفتر خارجہ طاہر اندرابی نے وفد کا خیرمقدم کیا اور پاکستان کی خارجہ پالیسی، سفارتی ترجیحات اور بدلتے ہوئے علاقائی و عالمی حالات پر تفصیلی بریفنگ دی۔
وزارتِ خارجہ کے مطابق وفد کو پاکستان کی خارجہ پالیسی کے بنیادی خدوخال، خطے اور دنیا میں تیزی سے بدلتی ہوئی جغرافیائی و سیاسی صورتحال، سفارتی چیلنجز اور قومی مفادات کے تحفظ کے لیے وزارتِ خارجہ کے کردار سے آگاہ کیا گیا۔
بریفنگ میں اس بات پر بھی روشنی ڈالی گئی کہ پاکستان اپنی خارجہ پالیسی کے ذریعے علاقائی امن، بین الاقوامی تعاون، اقتصادی سفارت کاری اور قومی مفادات کے فروغ کے لیے مختلف سفارتی اقدامات پر عمل پیرا ہے۔
اجلاس کے اختتام پر شرکاء اور ترجمان دفتر خارجہ طاہر اندرابی کے درمیان سوال و جواب کی ایک جامع اور انٹرایکٹو نشست بھی منعقد ہوئی، جس میں وفد کے ارکان نے خارجہ پالیسی، علاقائی صورتحال اور سفارتی امور سے متعلق مختلف سوالات کیے، جن کے تفصیلی جوابات دیے گئے۔
نیشنل میڈیا ورکشاپ کے وفد میں میڈیا، سول سوسائٹی اور مختلف سیاسی جماعتوں کے نمائندے شامل تھے، جنہوں نے وزارتِ خارجہ کے مختلف امور، سفارتی ترجیحات اور قومی مفادات کے تحفظ کے لیے کیے جانے والے اقدامات میں گہری دلچسپی کا اظہار کیا۔
